மதுரை: திண்டுக்கல் மாவட்டம் கொடைக்கானல் அருகேயுள்ள மன்னவநல்லூர் வனப்பகுதியை ஒட்டிய தனியார் தங்கும் விடுதிகளில் இரவு நேரங்களில் அதிக ஒலி எழுப்பும் இசை மற்றும் நடன நிகழ்ச்சிகளை நடத்துவதற்கு சென்னை உயர்நீதிமன்ற மதுரை அமர்வு இடைக்காலத் தடை விதித்துள்ளது.

சுற்றுலாப் பயணிகளின் பொழுதுபோக்கு நிகழ்ச்சிகளால் வனப்பகுதியின் இயற்கைச் சூழல் மற்றும் வனவிலங்குகளின் இயல்பான வாழ்வியல் பாதிக்கப்படுவதாகக் கூறி தாக்கல் செய்யப்பட்ட வழக்கை விசாரித்த நீதிபதிகள் இந்த உத்தரவை பிறப்பித்தனர்.

நீதிமன்ற உத்தரவின்படி, இரவு நேரங்களில் அதிக சத்தத்துடன் டிஜே இசை, கேளிக்கை நிகழ்ச்சிகள் மற்றும் நடன நிகழ்ச்சிகளை நடத்தக் கூடாது. மேலும், வனப்பகுதிகளுக்கு அருகே இரவு நேரங்களில் கேம்ப் ஃபையர் நிகழ்வுகள் நடத்துவதற்கும், தேவையற்ற வாகனப் போக்குவரத்தை மேற்கொள்வதற்கும் கட்டுப்பாடுகள் விதிக்கப்பட்டுள்ளன.

வனவிலங்குகளின் வாழ்விடங்களையும் சுற்றுச்சூழல் சமநிலையையும் பாதுகாப்பது முக்கியம் எனக் குறிப்பிட்ட நீதிபதிகள், நீதிமன்ற உத்தரவை மீறும் தனியார் விடுதிகள் மற்றும் சம்பந்தப்பட்ட நபர்கள் மீது மாவட்ட நிர்வாகம் மற்றும் வனத்துறை உரிய சட்ட நடவடிக்கை எடுக்க வேண்டும் என்று அறிவுறுத்தியுள்ளனர்.

கொடைக்கானல் மற்றும் அதன் சுற்றுவட்டார வனப்பகுதிகளில் சுற்றுச்சூழல் பாதுகாப்பை வலுப்படுத்தும் நோக்கில் பிறப்பிக்கப்பட்டுள்ள இந்த இடைக்கால உத்தரவு, சுற்றுச்சூழல் ஆர்வலர்கள் மற்றும் வனவிலங்கு பாதுகாப்பு அமைப்புகளிடையே வரவேற்பைப் பெற்றுள்ளது.