சென்னை: தென் மாவட்டங்களில் எதிர்பார்த்த அளவுக்கு கட்சியின் அமைப்பு வலுப்பெறாததை தவெக தலைமை கவனத்தில் எடுத்துள்ளதாக தகவல்கள் வெளியாகியுள்ளன. இதையடுத்து, தென் மாவட்டங்களில் முக்கிய வாக்கு வங்கியாக உள்ள நாடார் சமூகத்தின் ஆதரவை பெறுவதற்கான அரசியல் நடவடிக்கைகள் குறித்து கட்சிக்குள் ஆலோசனை நடைபெற்று வருவதாக கூறப்படுகிறது.

சட்டசபைத் தேர்தலில் தவெக பல இடங்களில் வெற்றி பெற்று ஆட்சி அமைத்திருந்தாலும், தென் மாவட்டங்களில் கட்சியின் செயல்பாடு எதிர்பார்த்த அளவில் அமையவில்லை எனக் கூறப்படுகிறது. குறிப்பாக தென்காசி, கன்னியாகுமரி உள்ளிட்ட சில மாவட்டங்களில் தவெக ஒரு தொகுதியிலும் வெற்றி பெறவில்லை என்ற தகவல் வெளியாகியுள்ளது.

தூத்துக்குடியில் மட்டும் ஒரு தொகுதியில் வெற்றி கிடைத்ததாகவும், நெல்லையில் கணிசமான வெற்றியைப் பெற்றிருந்தாலும், தேர்தலுக்குப் பிறகு கட்சியின் செயல்பாடுகள் குறித்து அதிருப்தி உருவாகியுள்ளதாகவும் கூறப்படுகிறது. இதன் பின்னணியிலேயே இசக்கி சுப்பையா தொடர்பான அரசியல் நகர்வுகளும் கவனம் பெற்றதாக தகவல்கள் தெரிவிக்கின்றன.

நிர்வாக ஒருங்கிணைப்பில் சிக்கல்.?

தேர்தலுக்குப் பிறகு தவெகவில் அதிகளவில் புதிய உறுப்பினர்கள் இணைந்திருந்தாலும், அவர்களை மாவட்ட மற்றும் தொகுதி அளவில் ஒருங்கிணைத்து செயல்படுத்துவதில் நிர்வாக ரீதியான சவால்கள் இருப்பதாக கட்சிக்குள் பேசப்படுகிறது.

மேலும், பல நிர்வாகிகள் அரசியல் ரீதியாக அனுபவம் குறைந்தவர்களாக இருப்பதால், மூத்த அரசியல் தலைவர்கள் மற்றும் உள்ளூர் செல்வாக்கு கொண்டவர்களை கையாள்வதில் சிக்கல்கள் இருப்பதாகவும் கூறப்படுகிறது.

இதனால் உடனடியாக உள்ளாட்சித் தேர்தலை நடத்துவதில் தவெக தலைமை ஆர்வம் காட்டவில்லை என்ற தகவலும் வெளியாகியுள்ளது. மாநகராட்சி உள்ளிட்ட உள்ளாட்சி அமைப்புகளின் பதவிக்காலம் முடிந்த பின்னர், சில காலம் அதிகாரிகள் மூலம் நிர்வாகத்தை நடத்தும் வாய்ப்பையும் கட்சி பரிசீலித்து வருவதாக கூறப்படுகிறது.

நாடார், முக்குலத்தோர் வாக்குகளை குறிவைக்கும் தவெக.?

தென் மாவட்டங்களில் அரசியல் ரீதியாக முக்கியத்துவம் வாய்ந்த நாடார் மற்றும் முக்குலத்தோர் சமூகங்களின் ஆதரவை தவெக இன்னும் முழுமையாகப் பெறவில்லை என்ற மதிப்பீடு கட்சிக்குள் இருப்பதாக கூறப்படுகிறது.

குறிப்பாக நாடார் சமூகத்தினரிடையே நீண்டகாலமாக முன்வைக்கப்படும் கள் இறக்குவதற்கான தடையை நீக்குவது தொடர்பாக தவெக அரசு முக்கிய அறிவிப்பை வெளியிடலாமா என்பது குறித்தும் ஆலோசனை நடைபெற்று வருவதாக தகவல்கள் தெரிவிக்கின்றன.

எனினும், இதுதொடர்பான எந்தவொரு முடிவும் அரசியல் கணக்கீடுகளை மட்டுமே அடிப்படையாகக் கொண்டதா அல்லது விவசாயிகள் மற்றும் கிராமப்புற பொருளாதாரத்தை கருத்தில் கொண்டதா என்பது குறித்து விவாதம் எழுந்துள்ளது.

இடைத்தேர்தல் முடிவுகள் மற்றும் தென் மாவட்டங்களில் கட்சியின் அடுத்தகட்ட வளர்ச்சி ஆகியவற்றை பொறுத்தே தவெக தலைமையின் அரசியல் வியூகம் மேலும் தெளிவாகும் என எதிர்பார்க்கப்படுகிறது.