சென்னை: தனியார் பல்கலைக்கழகங்கள் தொடங்குவதற்கான நிலம் மற்றும் வைப்புநிதி தொடர்பான விதிகளை தளர்த்தும் வகையில் தமிழக சட்டப்பேரவையில் நிறைவேற்றப்பட்டுள்ள திருத்த மசோதாவுக்கு இந்திய கம்யூனிஸ்ட் கட்சி எதிர்ப்பு தெரிவித்துள்ளது.

இதுகுறித்து அக்கட்சியின் மாநில செயலாளர் மு.வீரபாண்டியன் வெளியிட்ட அறிக்கையில், இந்தத் திருத்தம் உயர் கல்வியை தனியார் மயமாக்கும் நடவடிக்கையாக அமையும் எனக் குற்றம்சாட்டியுள்ளார்.

புதிய விதிகளின்படி தனியார் பல்கலைக்கழகங்கள் தொடங்குவதற்கான குறைந்தபட்ச நிலத் தேவை குறைக்கப்பட்டுள்ளதாக அவர் தெரிவித்துள்ளார். சென்னை பெருநகரப் பகுதிகளில் 12 ஏக்கர், பிற மாநகராட்சிகள் மற்றும் நகராட்சிகளில் 18 ஏக்கர், மற்ற பகுதிகளில் 25 ஏக்கர் நிலம் போதுமானதாக மாற்றப்பட்டுள்ளதாகவும் அவர் குறிப்பிட்டுள்ளார்.

மேலும், தனியார் பல்கலைக்கழகங்களை நிறுவுவதற்கான நிரந்தர அறக்கட்டளை நிதி தேவையும் குறைக்கப்பட்டுள்ளதாக அவர் தெரிவித்துள்ளார். இதுபோன்ற தளர்வுகள் உள்நாட்டு மற்றும் வெளிநாட்டு தனியார் பல்கலைக்கழகங்களின் வருகையை அதிகரிக்க வழிவகுக்கும் என்றும் அவர் கூறியுள்ளார்.

தனியார் பல்கலைக்கழகங்களில் இடஒதுக்கீடு முறையாக நடைமுறைப்படுத்தப்படாததால், இந்த நடவடிக்கை சமூக நீதி மற்றும் பொருளாதார ரீதியாக பின்தங்கிய மாணவர்களுக்கு பாதிப்பை ஏற்படுத்தக்கூடும் என்றும் மு.வீரபாண்டியன் தெரிவித்துள்ளார்.

உயர் கல்விக்கான தேவையை கருத்தில் கொண்டு, அரசு சார்பில் போதுமான கல்லூரிகள் மற்றும் பல்கலைக்கழகங்களை உருவாக்குவதற்கே முன்னுரிமை அளிக்க வேண்டும் எனவும் அவர் வலியுறுத்தியுள்ளார்.

தனியார் மற்றும் வெளிநாட்டு பல்கலைக்கழகங்களை அதிகளவில் ஊக்குவிப்பது உயர் கல்வியை வணிகமயமாக்கும் நிலைக்கு கொண்டு செல்லும் என்றும், இதனால் அடித்தட்டு மாணவர்கள் பாதிக்கப்பட வாய்ப்புள்ளதாகவும் இந்திய கம்யூனிஸ்ட் கட்சி எச்சரித்துள்ளது.

எனவே, மாணவர்களின் நலனை கருத்தில் கொண்டு தனியார் பல்கலைக்கழகங்கள் திருத்த மசோதாவை தமிழக அரசு திரும்பப் பெற வேண்டும் என அக்கட்சி வலியுறுத்தியுள்ளது.