கரூரில் நாளை முதலமைச்சர் விஜய்..! 10 ஏக்கர் மைதானத்தில் பலத்த பாதுகாப்பு ஏற்பாடுகள்.!
கரூர் மாவட்டத்தில் நாளை நடைபெறும் மக்கள் சந்திப்பு மற்றும் நலத்திட்ட உதவிகள் வழங்கும் விழாவில் தமிழக முதலமைச்சர் விஜய் பங்கேற்க உள்ளார். இதையொட்டி மாவட்ட நிர்வாகமும் காவல்துறையும் 10 ஏக்கர் பரப்பளவிலான மைதானத்தில் விரிவான பாதுகாப்பு மற்றும் உள்கட்டமைப்பு ஏற்பாடுகளை மேற்கொண்டுள்ளன.
கூட்ட நெரிசலைத் தவிர்க்கும் வகையில் நிகழ்ச்சி நடைபெறும் மேடை மற்றும் அரங்கைச் சுற்றி இரட்டை பாதுகாப்பு வளையம் அமைக்கப்பட்டுள்ளது. காவல்துறையின் முழுமையான சோதனைக்குப் பிறகே பொதுமக்கள் மற்றும் தொண்டர்கள் அரங்கிற்குள் அனுமதிக்கப்படுவார்கள்.
10,000 பேர் அமரும் வசதியுள்ள ஜெர்மன் பந்தலில், பாதுகாப்பு நடைமுறைகளை கருத்தில் கொண்டு 5,000 பேருக்கு மட்டுமே இருக்கை வசதி செய்யப்பட்டுள்ளதாக தெரிவிக்கப்பட்டுள்ளது. மேலும், 16 தனித்தனி அமர்வு பிரிவுகள், மின்விசிறி வசதி மற்றும் ஒழுங்குபடுத்தப்பட்ட இருக்கை அமைப்புகளும் செய்யப்பட்டுள்ளன.
நுழைவு மற்றும் வெளியேறும் பாதைகள் பொதுமக்கள், தொண்டர்கள் என தனித்தனியாக அமைக்கப்பட்டுள்ளன. முதலமைச்சரின் வாகனங்கள் நேரடியாக மேடையை அடையும் வகையில் தனி பாதுகாப்புப் பாதையும் ஏற்படுத்தப்பட்டுள்ளது.
நாளை காலை 8 மணி முதல் பொதுமக்கள் அனுமதிக்கப்படுவார்கள். காலை 11 மணிக்கு முதலமைச்சர் விஜய் மக்களை நேரில் சந்தித்து கோரிக்கை மனுக்களைப் பெற உள்ளார். போக்குவரத்து மற்றும் கூட்ட நெரிசலை கட்டுப்படுத்தும் வகையில் சிறப்பு வழித்தட திட்டமும் அமல்படுத்தப்பட்டுள்ளது.
