சிங்கப்பூர்: செயற்கை நுண்ணறிவு மற்றும் கம்ப்யூட்டிங் துறையில் புதிய முயற்சியாக, ஆய்வகத்தில் வளர்க்கப்பட்ட மனித நியூரான்களை பயன்படுத்தி இயங்கும் பயோலாஜிக்கல் டேட்டா சென்டர் புரோட்டோடைப்பை சிங்கப்பூர் உருவாக்கியுள்ளது.

சிங்கப்பூர் தேசிய பல்கலைக்கழகத்தின் கீழ் செயல்படும் கல்வி மற்றும் ஆராய்ச்சி நிறுவனங்கள் இணைந்து இந்த புதிய தொழில்நுட்பத்தை உருவாக்கியுள்ளதாக தெரிவிக்கப்பட்டுள்ளது.

இந்த முன்மாதிரி அமைப்பில் 20 பயோலாஜிக்கல் கம்ப்யூட்டிங் யூனிட்கள் இடம்பெற்றுள்ளன. ஒவ்வொரு யூனிட்டிலும் சுமார் 8 லட்சம் ஆய்வகத்தில் வளர்க்கப்பட்ட மனித நியூரான்கள் பயன்படுத்தப்படுகின்றன. இதன்படி, மொத்தமாக சுமார் 1.6 கோடி நியூரான்கள் இந்த அமைப்பில் இடம்பெற்றுள்ளதாக கூறப்படுகிறது.

நியூரான்கள் எப்படி கம்ப்யூட்டிங் செய்கின்றன?

வழக்கமான டேட்டா சென்டர்களில் சிலிக்கான் சிப்கள் முக்கிய பங்கு வகிக்கும் நிலையில், இந்த புதிய அமைப்பில் மனித ஸ்டெம் செல்களில் இருந்து உருவாக்கப்பட்ட நியூரான்கள் பயன்படுத்தப்படுகின்றன.

இந்த நியூரான்கள் மைக்ரோஎலக்ட்ரோடு அரே பொருத்தப்பட்ட சிலிக்கான் தளத்தில் வளர்க்கப்படுகின்றன. இதன் மூலம் நியூரான்களுக்கு மின் சிக்னல்களை அனுப்பவும், அவற்றின் செயல்பாடுகளை பதிவு செய்யவும் முடியும்.

இதற்காக உருவாக்கப்பட்டுள்ள biOS அமைப்பு, மென்பொருள் மற்றும் உயிருள்ள நியூரல் நெட்வொர்க்குக்கு இடையே நிகழ்நேர தொடர்பை ஏற்படுத்த உதவுகிறது. இந்த தொழில்நுட்பத்தில் நியூரான் கல்சர்களை சுமார் ஆறு மாதங்கள் வரை உயிருடன் பராமரிக்க முடியும் என ஆய்வாளர்கள் தெரிவிக்கின்றனர்.

'Pong' விளையாடிய நியூரான்கள்

இந்த முயற்சிக்கு முன்மாதிரியாக 'DishBrain' என்ற பரிசோதனை பயன்படுத்தப்பட்டுள்ளது. அதில் மனித மற்றும் எலி நியூரான்களை சிப்புடன் இணைத்து, Pong என்ற கணினி விளையாட்டை விளையாடும் வகையில் பயிற்சி அளிக்கப்பட்டது.

மின் சிக்னல்கள் மூலம் விளையாட்டு சூழல் நியூரான்களுக்கு வழங்கப்பட்ட நிலையில், அவை அதற்கேற்ப செயல்பட்டு விளையாட்டை கற்றுக்கொண்டன. இந்த ஆய்வு, உயிருள்ள நியூரல் நெட்வொர்க்குகளை கம்ப்யூட்டிங் பணிகளில் பயன்படுத்துவதற்கான சாத்தியத்தை வெளிப்படுத்தியது.

AI துறையில் புதிய மாற்றமா?

மனித நியூரல் நெட்வொர்க்குகள் சூழலுக்கு ஏற்ப கற்றுக்கொண்டு தங்களை மாற்றிக்கொள்ளும் திறன் கொண்டவை என்பதால், அதிக அளவிலான தரவு தேவைப்படும் சில AI பணிகளில் எதிர்காலத்தில் இத்தொழில்நுட்பம் பயன்படலாம் என ஆய்வாளர்கள் கருதுகின்றனர்.

குறிப்பாக, தற்போதைய AI அமைப்புகளில் முக்கிய சவாலாக உள்ள அதிகப்படியான மின்சார பயன்பாட்டை குறைக்கவும் உயிரியல் கம்ப்யூட்டிங் உதவக்கூடும் என எதிர்பார்க்கப்படுகிறது.

மருந்து கண்டுபிடிப்பு, உயிரியல் ஆராய்ச்சி, செயற்கை நுண்ணறிவு, ரோபோட்டிக்ஸ், சைபர் பாதுகாப்பு மற்றும் மோசடி கண்டறிதல் உள்ளிட்ட துறைகளிலும் இந்த தொழில்நுட்பத்துக்கு எதிர்காலத்தில் பயன்பாடுகள் இருக்கலாம்.

எனினும், தற்போதைய சிலிக்கான் அடிப்படையிலான கம்ப்யூட்டர்களுக்கு உடனடி மாற்றாக இந்த தொழில்நுட்பத்தை கருத முடியாது. இதன் செயல்திறன், நீண்டகால நிலைத்தன்மை மற்றும் பெரிய அளவில் பயன்படுத்துவதற்கான சாத்தியம் ஆகியவை இன்னும் ஆராய்ச்சி நிலையில் உள்ளன.

ஆய்வகத்தில் வளர்க்கப்பட்ட மனித நியூரான்களையே கம்ப்யூட்டிங் அமைப்பின் ஒரு பகுதியாக பயன்படுத்தும் சாத்தியத்தை சோதிக்கும் இந்த முயற்சி, எதிர்கால டேட்டா சென்டர்களின் தொழில்நுட்ப வளர்ச்சியில் முக்கியமான கட்டமாக பார்க்கப்படுகிறது.