கர்நாடகாவில் காங்கிரஸ் ஆட்சி, தமிழ்நாட்டில் தவெக-காங்கிரஸ் கூட்டணி ஆட்சி என அரசியல் ரீதியாக இணக்கமான சூழல் நிலவினாலும், ‘காவிரி’ என்ற விவகாரம் எழும்போது இரு மாநிலங்களும் தங்களது உரிமை நிலைப்பாட்டில் எந்த சமரசத்திற்கும் தயாரில்லை என்பது மீண்டும் வெளிப்பட்டுள்ளது. குறிப்பாக மேகதாது அணை விவகாரம் தற்போது தமிழகம் - கர்நாடகா இடையேயான புதிய அரசியல் மற்றும் சட்டப்போருக்கு வழிவகுத்துள்ளது.

சில நாட்களுக்கு முன்பு கர்நாடக துணை முதலமைச்சர் டி.கே.சிவக்குமார், மேகதாது அணை அமைப்பதற்கான மாற்று வனப்பகுதிகள் அடையாளம் காணப்பட்டுவிட்டதாகவும், விரைவில் புதிய திட்ட அறிக்கையை மத்திய அரசிடம் சமர்ப்பித்து பூமிபூஜை நடத்தப்படும் என்றும் அறிவித்தார். மேலும், “இதற்காக தமிழ்நாட்டின் அனுமதி தேவையில்லை” என்ற அவரது கருத்து தமிழக அரசியல் வட்டாரங்களில் கடும் எதிர்ப்பை ஏற்படுத்தியது.

இந்த விவகாரத்தில் முதல்வர் விஜய்யின் மௌனம் குறித்து சீமான் உள்ளிட்ட எதிர்க்கட்சிகள் கேள்வி எழுப்பிய நிலையில், சென்னை தலைமைச் செயலகத்தில் அவசர ஆலோசனை கூட்டம் நடைபெற்றது. இதில் நீர்வளத்துறை அமைச்சர் என்.ஆனந்த், பொதுப்பணித்துறை அமைச்சர் ஆதவ் அர்ஜுனா, சட்டத்துறை அமைச்சர் சி.டி.ஆர்.நிர்மல்குமார் மற்றும் காவிரி வழக்கறிஞர்கள் பங்கேற்றனர். அப்போது மேகதாது அணை தொடர்பாக உச்ச நீதிமன்றத்தில் தமிழக அரசுக்கு ஏற்பட்ட புதிய சட்ட பின்னடைவை அதிகாரிகள் முதல்வரிடம் விளக்கினர்.

கடந்த 2025 நவம்பரில் உச்ச நீதிமன்றம், மேகதாது அணைக்கான ஆரம்பகட்ட திட்ட அறிக்கை தயாரிப்பு பணியை மத்திய நீர்வள ஆணையம் கண்காணிக்கலாம் என்று அனுமதி வழங்கியிருந்தது. இதனை எதிர்த்து தமிழக அரசு தாக்கல் செய்த மறுஆய்வு மனுவை தலைமை நீதிபதி சூர்யகாந்த் தலைமையிலான அமர்வு மே 25ஆம் தேதி தள்ளுபடி செய்துள்ளது. “ஒவ்வொரு மாநிலத்திற்கும் தங்களுக்கு ஒதுக்கப்பட்ட நீரை பயன்படுத்த உரிமை உண்டு. இறுதி திட்ட அறிக்கை உச்ச நீதிமன்ற தீர்ப்புகளுக்கு முரணாக இருந்தால் மட்டுமே சட்டரீதியான எதிர்ப்பு முன்வைக்கலாம்” என்று நீதிமன்றம் தெளிவுபடுத்தியதாக கூறப்படுகிறது.

ஆனால், இதனால் கர்நாடகா ஒருதலைப்பட்சமாக அணை கட்டிவிட முடியாது என்பதில் தமிழக அரசு உறுதியாக உள்ளது. காவிரி நடுவர் மன்றம் மற்றும் 2018 உச்ச நீதிமன்ற இறுதி தீர்ப்பின்படி, கீழ்மடை மாநிலமான தமிழ்நாட்டின் ஒப்புதல் இன்றி புதிய நீர்த்தேக்கங்களை அமைக்க முடியாது என்பதே தமிழகத்தின் முக்கிய வாதமாக உள்ளது. இதனால் கர்நாடகா மத்திய அரசிடம் விரிவான திட்ட அறிக்கை தாக்கல் செய்யும் முன்பே, சட்ட ரீதியான அடுத்தகட்ட நடவடிக்கைகள் எடுக்க அதிகாரிகளுக்கு முதல்வர் விஜய் உத்தரவிட்டுள்ளதாக தகவல்கள் தெரிவிக்கின்றன.

இதற்கிடையில், கர்நாடகாவில் ஆட்சியில் உள்ள காங்கிரஸ் கட்சியே தமிழ்நாட்டில் தவெக-காங்கிரஸ் கூட்டணி உருவாக முக்கிய பங்காற்றியிருந்தது. ஆனால் மேகதாது விவகாரத்தில் கர்நாடக காங்கிரஸ் அரசு, இதை பெங்களூருவின் குடிநீர் தேவையுடன் தொடர்புபடுத்தி தீவிரமாக முன்னெடுத்து வருகிறது. தமிழக காங்கிரஸ் தலைவர்கள் உள்ளூரில் எதிர்ப்பு தெரிவித்தாலும், கூட்டணிக்குள் அழுத்தமான சூழல் உருவாகியுள்ளது.

இந்த அரசியல் சூழலை பயன்படுத்தி, “கூட்டணி அரசியலுக்காக காவிரி உரிமையை விஜய் அரசு விட்டுக்கொடுக்குமா?” என்று திமுக, அதிமுக உள்ளிட்ட எதிர்க்கட்சிகள் டெல்டா மாவட்டங்களில் பிரச்சாரம் செய்து வருகின்றன. இதனால் கூட்டணியில் பிளவு ஏற்படாதவாறு பார்த்துக்கொள்வதோடு, விவசாயிகளின் வாழ்வாதாரத்தில் எந்த சமரசமும் செய்யாமல் கர்நாடகாவை சட்ட ரீதியாக கட்டுப்படுத்தும் நடவடிக்கைகளில் விஜய் அரசு தீவிரம் காட்டி வருகிறது.