தேர்தல் பயணம்: ஆம்னி பேருந்துகளில் கூடுதல் கட்டணம் வசூலித்தால் கடும் நடவடிக்கை

சென்னை: தமிழ்நாடு சட்டமன்றத் தேர்தல் 2026-ஐ முன்னிட்டு, வாக்களிக்க சொந்த ஊர்களுக்கு பயணம் செய்யும் பொதுமக்களிடம் தனியார் ஆம்னி பேருந்துகள் அதிக கட்டணம் வசூலிப்பதாகப் புகார்கள் எழுந்துள்ள நிலையில், போக்குவரத்துத் துறை கடும் எச்சரிக்கை விடுத்துள்ளது. வரும் ஏப்ரல் 23ஆம் தேதி நடைபெறும் வாக்குப்பதிவை முன்னிட்டு, 21.04.2026 முதல் 26.04.2026 வரை பயணிகள் எண்ணிக்கை அதிகரிக்கும் சூழ்நிலையை சில ஆம்னி பேருந்துகள் தவறாக பயன்படுத்துவதாக குற்றச்சாட்டு எழுந்துள்ளது.

இதனை கட்டுப்படுத்தும் வகையில், தமிழ்நாடு முழுவதும் வட்டாரப் போக்குவரத்து அலுவலர்கள், மோட்டார் வாகன ஆய்வாளர்கள் மற்றும் சோதனைச்சாவடி அதிகாரிகள் இணைந்து சிறப்பு கண்காணிப்பு குழுக்கள் அமைக்கப்பட்டுள்ளன. இக்குழுக்கள் மாநிலம் முழுவதும் தீவிர சோதனைகள் மேற்கொண்டு, விதிமுறைகளை மீறி கூடுதல் கட்டணம் வசூலிக்கும் பேருந்துகளுக்கு எதிராக கடுமையான நடவடிக்கைகள் எடுக்க உள்ளன. இதில் அனுமதி ரத்து உள்ளிட்ட நடவடிக்கைகளும் அடங்கும் என அதிகாரிகள் தெரிவித்துள்ளனர்.

மேலும், பொதுமக்கள் நேரடியாக புகார் அளிக்க வசதியாக, தொலைபேசி, வாட்ஸ் ஆப், குறுஞ்செய்தி மற்றும் குரல் பதிவு மூலம் தகவல் தெரிவிக்க பல்வேறு கட்டுப்பாட்டு எண்கள் அறிவிக்கப்பட்டுள்ளன. சென்னை, மதுரை, கோயம்புத்தூர், திருச்சி உள்ளிட்ட முக்கிய நகரங்களை உள்ளடக்கிய பகுதிகளுக்கு தனித்தனியான தொடர்பு எண்கள் வழங்கப்பட்டுள்ளன. அதிக கட்டணம் வசூலிக்கும் சம்பவங்கள் குறித்து மக்கள் உடனடியாக தகவல் அளித்தால், விரைந்து நடவடிக்கை எடுக்கப்படும் என்றும் போக்குவரத்துத் துறை உறுதியளித்துள்ளது.

தேர்தல் காலத்தில் பொதுமக்கள் சிரமமின்றி பயணம் செய்யவும், அநியாய கட்டண வசூலை தடுக்கவும் அரசு தீவிரமாக செயல்பட்டு வருவதாக அதிகாரப்பூர்வ அறிக்கையில் குறிப்பிடப்பட்டுள்ளது.

பொதுமக்கள் ஆம்னி பேருந்துகளில் அதிக கட்டணம் வசூலிப்பதாக தெரியவந்தால் உரிய நடவடிக்கை மேற்கொள்ளும் பொருட்டு கீழ்காணும் அலைப்பேசி எண்கள் மூலம், வாட்ஸ் ஆப் / குறுஞ்செய்தி / குரல் பதிவு மூலமாக புகார் தெரிவிக்க கேட்டுக்கொள்ளப்படுகிறது.

போக்குவரத்து மற்றும் சாலை பாதுகாப்பு ஆணையரகம், சென்னை - 1800 425 6151

இணைப்போக்குவரத்து ஆணையரகம், சென்னை (வடக்கு) - 99442 53404

இணைப்போக்குவரத்து ஆணையரகம், சென்னை (தெற்கு) - 97905 50052

இணைப்போக்குவரத்து ஆணையரகம், மதுரை - 90953 66394

இணைப்போக்குவரத்து ஆணையரகம், கோயம்புத்தூர் - 91235 93971

துணைப்போக்குவரத்து ஆணையரகம், விழுப்புரம் - 96773 98825

துணைப்போக்குவரத்து ஆணையரகம், வேலூர் - 98400 23011

துணைப்போக்குவரத்து ஆணையரகம், சேலம் - 78456 36423

துணைப்போக்குவரத்து ஆணையரகம், ஈரோடு - 80569 40040

துணைப்போக்குவரத்து ஆணையரகம், திருச்சிராப்பள்ளி - 90660 32343

துணைப்போக்குவரத்து ஆணையரகம், விருதுநகர் - 90257 23800

துணைப்போக்குவரத்து ஆணையரகம், திருநெல்வேலி - 96981 18011