சென்னை: முதல்வர் விஜய் தலைமையில் தமிழக அமைச்சரவை கூட்டம் இன்று சென்னை தலைமைச் செயலகத்தில் நடைபெற்றது. இதில், 2026–27ஆம் ஆண்டுக்கான தமிழக அரசின் முதல் பொது பட்ஜெட் மற்றும் வேளாண் பட்ஜெட்டில் இடம்பெறவுள்ள முக்கிய அறிவிப்புகள் குறித்து விரிவான ஆலோசனை நடைபெற்றதாக தகவல்கள் தெரிவிக்கின்றன.

வரவிருக்கும் பட்ஜெட்டில் புதிய நலத்திட்டங்கள், தொழில் முதலீடுகள், உள்கட்டமைப்பு மேம்பாட்டு பணிகள், துறைகளுக்கான நிதி ஒதுக்கீடு உள்ளிட்ட பல்வேறு அம்சங்கள் குறித்து அமைச்சர்கள் மற்றும் உயரதிகாரிகளுடன் முதல்வர் ஆலோசனை நடத்தியதாக கூறப்படுகிறது.

மேலும், புதிய தொழில் திட்டங்களுக்கு அனுமதி வழங்குவது, வளர்ச்சித் திட்டங்களுக்கு அமைச்சரவை ஒப்புதல் அளிப்பது மற்றும் பட்ஜெட் தாக்கல் செய்யப்படும் தேதி குறித்தும் ஆலோசிக்கப்பட்டதாக தகவல்கள் வெளியாகியுள்ளன.

தேர்தல் அறிக்கையில் இடம்பெற்ற முக்கிய வாக்குறுதிகளை படிப்படியாக செயல்படுத்துவது குறித்தும் ஆலோசனை நடைபெற்றதாக கூறப்படுகிறது. குடும்பத் தலைவிகளுக்கு மாதாந்திர நிதியுதவி, இலவச எரிவாயு சிலிண்டர் வழங்குதல், திருமண உதவித் திட்டங்கள், கல்விக் கடன், மருத்துவக் காப்பீடு, வேலைவாய்ப்பு ஆதரவு உள்ளிட்ட பல்வேறு திட்டங்கள் குறித்து அதிகாரிகள் ஆய்வு மேற்கொண்டதாக தகவல்கள் தெரிவிக்கின்றன.

இதற்கிடையில், சமூக நலத் திட்டங்கள் மற்றும் மாநிலத்தின் உள்கட்டமைப்பு மேம்பாட்டிற்கான நிதி ஒதுக்கீட்டில் சமநிலையை பேணுவது தொடர்பாகவும் அமைச்சரவையில் விவாதிக்கப்பட்டதாக கூறப்படுகிறது.

அதேநேரத்தில், குடும்பத் தலைவிகளுக்கு மாதம் ரூ.2,500 வழங்குவது உள்ளிட்ட திட்டங்கள் குறித்து அரசு இதுவரை அதிகாரப்பூர்வ அறிவிப்பு எதையும் வெளியிடவில்லை. இந்தத் திட்டங்கள் பட்ஜெட்டில் இடம்பெறுமா என்பது பட்ஜெட் தாக்கலின்போது தான் உறுதியாகத் தெரியவரும்.