சென்னை: நடிகர் தனுஷ் அரசியலுக்கு வருவாரா என்ற கேள்வி மீண்டும் அரசியல் மற்றும் திரையுலக வட்டாரங்களில் விவாதத்தை ஏற்படுத்தியுள்ளது. அண்மையில் நடைபெற்ற அவரது பிறந்தநாள் விழாவில் அவர் ஆற்றிய உரையைத் தொடர்ந்து, எதிர்காலத்தில் அரசியல் களத்தில் குதிக்கக்கூடும் என்ற ஊகங்கள் சமூக வலைதளங்களிலும் அரசியல் வட்டாரங்களிலும் பரவி வருகின்றன. இதனிடையே, முதல்வர் விஜய்யின் ஜோதிடர் என அறியப்படும் ரதன் பண்டிட் வெற்றிவேல் தெரிவித்த கருத்துகள் புதிய கவனத்தை ஈர்த்துள்ளன.

தமிழக அரசியலில் சினிமா மற்றும் அரசியல் இடையே நீண்டகால தொடர்பு இருந்து வருகிறது. முன்னாள் முதலமைச்சர்கள் எம்.ஜி.ஆர். மற்றும் ஜெயலலிதா முதல் தற்போது முதலமைச்சராக உள்ள விஜய் வரை, திரையுலக பின்னணியில் இருந்து அரசியலுக்கு வந்த பலர் முக்கிய இடத்தைப் பிடித்துள்ளனர். இருப்பினும், சிவாஜி கணேசன், பாக்யராஜ், டி. ராஜேந்தர், கார்த்திக், விஜயகாந்த், சரத்குமார், கமல்ஹாசன், சீமான் உள்ளிட்ட பலர் அரசியல் கட்சிகளை தொடங்கியிருந்தாலும், முதலமைச்சர் பதவியை அடைய முடியாத நிலையும் தமிழக அரசியல் வரலாற்றில் பதிவாகியுள்ளது.

இந்த நிலையில், தனுஷின் அரசியல் எதிர்காலம் குறித்து நடைபெற்ற நிகழ்ச்சி ஒன்றில் ரதன் பண்டிட் வெற்றிவேலிடம் கேள்வி எழுப்பப்பட்டது. அதற்கு பதிலளித்த அவர், "தனுஷ் முழுமையாக அரசியலில் ஈடுபட முடிவு செய்தால், தமிழக அரசியலில் மிகப்பெரிய மாற்றங்கள் நிகழலாம். அவர் அரசியலுக்கு வந்தால் திமுக, அதிமுக ஆகிய கட்சிகளுக்கு அடுத்ததாக அல்ல, நேரடியாக முக்கிய அரசியல் சக்தியாக உருவெடுக்கும் வாய்ப்பு உள்ளது. அவரது ஜாதகத்தை நான் பார்த்திருக்கிறேன். அவர் அதிர்ஷ்டம் நிறைந்தவர். அரசியலில் வெற்றி பெற அனுபவம் மட்டுமல்ல, மக்களுக்கு உதவும் மனப்பான்மையும் முக்கியம். தனுஷ் அரசியலில் முழுமையாக களமிறங்கினால், 2031 தேர்தல் 'விஜய் எதிர் தனுஷ்' என்ற அரசியல் போட்டியாக மாறக்கூடும்" என்று தனது தனிப்பட்ட கருத்தை தெரிவித்துள்ளார்.

அவரது இந்த கருத்துகள் சமூக வலைதளங்களில் பரவலாகப் பேசப்பட்டு வருகின்றன. இருப்பினும், இது ஜோதிடரின் தனிப்பட்ட மதிப்பீடு மட்டுமே; இதுகுறித்து நடிகர் தனுஷ் எந்தவித அதிகாரப்பூர்வ அறிவிப்பும் வெளியிடவில்லை என்பது குறிப்பிடத்தக்கது.

இதற்கிடையில், அண்மையில் தனுஷ் ரசிகர் நற்பணி மன்றத்தின் கொடி தொடர்பாக சமூக வலைதளங்களில் சர்ச்சையும் எழுந்தது. அந்தக் கொடியின் வடிவமைப்பு குறிப்பிட்ட சமூக அடையாளத்துடன் ஒத்துப்போகிறது என சிலர் விமர்சனம் முன்வைத்தனர். மேலும், தனுஷ் தெலுங்கு மொழி பேசும் சமூகத்தைச் சேர்ந்தவர் என்ற தகவலை முன்வைத்து, தமிழக அரசியலில் அவரது வருகைக்கு சில அமைப்புகள் எதிர்ப்பு தெரிவித்து வருகின்றன.

மறுபுறம், நடிகர் தனுஷின் ரசிகர்கள் இந்த விமர்சனங்களை நிராகரித்து, "ஒரு தலைவரின் மொழி அல்லது சமூகப் பின்னணியை விட, அவரது செயல்பாடுகளும் மக்கள் நல எண்ணங்களுமே முக்கியம். தனுஷ் அரசியலுக்கு வந்தால் அவருக்கு முழு ஆதரவு வழங்கத் தயாராக இருக்கிறோம்" என்று சமூக வலைதளங்களில் கருத்து தெரிவித்து வருகின்றனர்.

தற்போதைக்கு நடிகர் தனுஷ் அரசியலுக்கு வருவது குறித்து எந்த அதிகாரப்பூர்வ அறிவிப்பும் வெளியாகவில்லை. இருப்பினும், அவரது பெயரைச் சுற்றி உருவாகி வரும் அரசியல் ஊகங்கள், சமூக வலைதள விவாதங்கள் மற்றும் பல்வேறு கருத்துக்கள் தமிழக அரசியல் களத்தில் புதிய எதிர்பார்ப்பை ஏற்படுத்தியுள்ளன. தனுஷ் அரசியலில் களமிறங்குவாரா, அல்லது இந்த விவாதங்களுக்கு முற்றுப்புள்ளி வைப்பாரா என்பது அவரது அடுத்தகட்ட அறிவிப்புகளைப் பொறுத்தே தெரியவரும்.