டி.என் 2026 படத்தின் ப்ரோமோ நேற்று வெளியான சில மணி நேரங்களிலேயே சமூக வலைதளங்களில் பெரும் விவாதத்தை கிளப்பியுள்ளது. ப்ரோமோவில் இடம்பெற்ற அரசியல் சாடல் காட்சிகள், ரசிகர்கள் மற்றும் நெட்டிசன்களிடையே கருத்து வேறுபாடுகளை உருவாக்கியுள்ளது.

ப்ரோமோவால் கிளம்பிய சர்ச்சை

ப்ரோமோவில், விஜய் அரசியல் வருகையை ஒட்டிய காட்சிகள் இருப்பதாக கூறப்படுகிறது. இதனால், “இது தேவையா?” என்ற கேள்வியும், “சினிமாவை சினிமாவாகப் பாருங்கள்” என்ற எதிர்வினைகளும் இணையத்தில் மோதுகின்றன.

மேலும், சில அரசியல் நபர்களை ஒத்த கெட்டப்புகள் மற்றும் உரையாடல்கள் இடம்பெற்றுள்ளதாக கூறப்படுவதால், படம் வெளியீட்டுக்கு முன்பே சர்ச்சையின் மையமாக மாறியுள்ளது.

படம் சொல்லும் கதை

இந்த படம் சாதாரண கமர்ஷியல் அல்ல; முழுக்க அரசியல் சாடலை மையமாகக் கொண்டதாக உருவாகியுள்ளது. கடந்த பல ஆண்டுகளாக தமிழக அரசியலில் நடந்த மாற்றங்கள், அதிகாரப் போட்டிகள் மற்றும் மக்களின் மனநிலைகளை ரியலிஸ்டிக் அணுகுமுறையில் காட்ட முயற்சி செய்துள்ளதாக கூறப்படுகிறது.

நடிகர் மாற்றங்கள் கவனம்

நட்டி என அறியப்படும் நட்ராஜ், இப்படத்தில் பல்வேறு கெட்டப்புகளில் தோன்றுகிறார். ஒவ்வொரு தோற்றமும் ஒரு அரசியல் முகத்தை பிரதிபலிக்கும் வகையில் வடிவமைக்கப்பட்டுள்ளதாக தகவல்.

அதேபோல், தம்பி ராமையா, எம். எஸ். பாஸ்கர் உள்ளிட்டவர்கள் பல அரசியல் நபர்களை ஒத்த கேரக்டர்களில் நடித்துள்ளதாக கூறப்படுகிறது. சீமான் போன்றவர்களை நினைவூட்டும் காட்சிகளும் கவனத்தை ஈர்த்துள்ளன.

நட்டியின் விளக்கம்

ப்ரோமோவுக்குப் பிறகு எழுந்த விமர்சனங்களுக்கு பதிலளித்த நட்டி, “இந்த காட்சிகள் யாரையும் குறிவைத்து எடுக்கப்படவில்லை. கதைக்குத் தேவையானவை மட்டுமே. விஜய் பார்த்தாலும் தவறாக எடுத்துக் கொள்ள மாட்டார்” என்று தெரிவித்துள்ளார்.

மேலும், “பல கெட்டப்புகள் மூலம் கடந்த 50 ஆண்டுகளாக நடந்த அரசியல் மாற்றங்களை சினிமா மொழியில் சொல்ல முயற்சி செய்துள்ளோம்” என்றும் அவர் கூறினார்.

வெளியீட்டு தகவல்

உமாபதி ராமையா இயக்கத்தில் உருவாகியுள்ள இந்த படம், ஏப்ரல் 10ஆம் தேதி வெளியாக உள்ளது.