திமுக சின்னமான உதயசூரியன் சின்னத்தில் போட்டியிட்டது “துரதிர்ஷ்டவசமானது” என்று துரை வைகோ தெரிவித்த கருத்துக்கு, முன்னாள் திமுக நிர்வாகி கே.எஸ். ராதாகிருஷ்ணன் கடும் கண்டனம் தெரிவித்துள்ளார். கூட்டணியில் இருந்தபோதே அந்த முடிவை எதிர்த்து வெளியேறாமல், தேர்தலுக்குப் பிறகு இவ்வாறு கருத்து தெரிவிப்பது அரசியல் நாகரிகத்திற்கு முரணானது என்று அவர் விமர்சித்துள்ளார். “மானம், வெட்கம், ரோசம் இருந்திருந்தால் அப்போதே உதயசூரியன் சின்னத்தில் போட்டியிட மாட்டோம் என்று கூறி கூட்டணியை விட்டு வெளியேறியிருக்கலாம்” என்று அவர் தனது எதிர்ப்பை வெளிப்படுத்தியுள்ளார்.

2026 சட்டப்பேரவைத் தேர்தலுக்குப் பிறகு தமிழக அரசியல் சூழலில் ஏற்பட்டுள்ள மாற்றங்கள் மத்தியில், மதிமுக மற்றும் தவெக இடையேயான நெருக்கம் அரசியல் வட்டாரங்களில் பேசுபொருளாக மாறியுள்ளது. முதல்வர் விஜய்யை திருச்சியில் நேரில் வரவேற்ற துரை வைகோ, “தனி சின்னத்தில் போட்டியிட்டிருந்தால் தவெகவுக்கு ஆதரவு அளித்திருக்கலாம்” என்று கூறியிருந்தார். இந்தக் கருத்தே தற்போது திமுக - மதிமுக உறவில் புதிய சர்ச்சையை உருவாக்கியுள்ளது. திமுக சின்னத்தில் போட்டியிட்டு வெற்றி பெற்ற பின்னர், அதையே குறை கூறுவது ஏற்றுக்கொள்ள முடியாதது என கே.எஸ். ராதாகிருஷ்ணன் சுட்டிக்காட்டியுள்ளார்.

மேலும், “முற்றிலும் அரசியல் பலம் இழந்திருந்த மதிமுகவுக்கு மீண்டும் உயிர் கொடுத்தது திமுக தான் என்பதை மறந்துவிடக் கூடாது. கலைஞர், ஸ்டாலின் குறித்து கடந்த காலத்தில் கடுமையாக விமர்சித்தவர்களையே திமுக அரவணைத்தது. அந்த நன்றியை மறந்து இன்று வேறு அரசியல் நிலைப்பாடு எடுப்பது சந்தர்ப்பவாத அரசியலை வெளிப்படுத்துகிறது” என்றும் அவர் குற்றஞ்சாட்டியுள்ளார். வைகோ மற்றும் துரை வைகோவின் சமீபத்திய நடவடிக்கைகள் தவெக ஆதரவு நிலைப்பாட்டை வெளிப்படுத்துவதாகவும், இதுகுறித்து தாம் முன்பே எச்சரித்திருந்ததாகவும் அவர் தெரிவித்துள்ளார்.

இந்நிலையில், மதிமுக திமுக கூட்டணியில் இருந்து விலகி தவெகவுடன் இணையும் என்ற ஊகங்கள் சமூக வலைதளங்களில் பரவியுள்ளன. எனினும், இதனை மறுத்துள்ள வைகோ, எந்த அவசர முடிவும் எடுக்கப்படாது என்றும், ஜூன் 27-ஆம் தேதி நடைபெறவுள்ள பொதுக்குழு கூட்டத்தில் கட்சியின் எதிர்கால அரசியல் நிலைப்பாடு குறித்து ஆலோசித்து முடிவு எடுக்கப்படும் என்றும் விளக்கம் அளித்துள்ளார். இந்த விவகாரம் தமிழக அரசியலில் கூட்டணி கணக்குகளை மீண்டும் பரபரப்பாக்கியுள்ளது.