காஞ்சிபுரம் தொகுதியில் நன்றி தெரிவிக்கும் நிகழ்ச்சியில் கலந்து கொண்ட வனத்துறை அமைச்சர் ஆர்.வி. ரஞ்சித் குமார், பொதுமக்கள் எழுப்பிய மின்தடை புகாரைத் தொடர்ந்து மின்வாரிய அதிகாரியுடன் நேரடியாக தொலைபேசியில் பேசி நடவடிக்கை எடுக்க வலியுறுத்தினார்.

காஞ்சிபுரம் சட்டமன்றத் தொகுதியில் வெற்றி பெற்றதைத் தொடர்ந்து, அமைச்சர் பல்வேறு பகுதிகளுக்குச் சென்று வாக்காளர்களுக்கு நன்றி தெரிவித்து வருகிறார். அந்த வகையில் குண்டுகுளம், விப்பேடு, நரப்பாக்கம், மேல்கதிர்பூர் மற்றும் கீழ்க்கதிர்பூர் உள்ளிட்ட பகுதிகளில் நடைபெற்ற நிகழ்ச்சிகளில் அவர் பங்கேற்றார்.

நரப்பாக்கம் பகுதியில் நடைபெற்ற சந்திப்பின்போது, கடந்த சில நாட்களாக இரவு நேரங்களில் அடிக்கடி மின்தடை ஏற்படுவதாக பொதுமக்கள் அமைச்சரிடம் புகார் தெரிவித்தனர். இதையடுத்து அமைச்சர் உடனடியாக மின்வாரிய கண்காணிப்புப் பொறியாளரை தொடர்புகொண்டு, நிலைமை குறித்து விளக்கம் கேட்டார்.

அப்போது அதிகாரி, சம்பந்தப்பட்ட பகுதியில் பணிபுரியும் சில அதிகாரிகள் மீது ஏற்கனவே புகார்கள் வந்துள்ளதாகவும், அதுகுறித்து நிர்வாக ரீதியான நடவடிக்கைகள் மேற்கொள்ளப்பட்டு வருவதாகவும் தெரிவித்ததாக கூறப்படுகிறது.

பின்னர் பொதுமக்களிடம் பேசிய அமைச்சர், மின்விநியோகக் குறைபாடுகள் குறித்து அரசு தீவிர கவனம் செலுத்தி வருவதாகவும், பிரச்சினைகளை உடனடியாக சரிசெய்ய அதிகாரிகளுக்கு அறிவுறுத்தப்பட்டுள்ளதாகவும் தெரிவித்தார். மேலும், பணியில் அலட்சியம் காட்டும் அதிகாரிகள் மீது உரிய நடவடிக்கை எடுக்கப்படும் என்றும் எச்சரித்தார்.

இந்தச் சம்பவம் அப்பகுதியில் பரபரப்பை ஏற்படுத்திய நிலையில், மின்தடை பிரச்சினைக்கு விரைவில் தீர்வு கிடைக்கும் என்ற நம்பிக்கையை பொதுமக்கள் வெளிப்படுத்தியுள்ளனர்.