சென்னை: நெல் மற்றும் கரும்பு விவசாயிகளுக்கு கூடுதல் ஊக்கத்தொகை வழங்கப்படும் என தமிழ்நாடு முதலமைச்சர் விஜய் சட்டப்பேரவையில் 110 விதியின் கீழ் அறிவித்துள்ளார்.

தமிழ்நாடு சட்டப்பேரவையில் பட்ஜெட் மீதான விவாதம் நடைபெற்று வரும் நிலையில், இன்று நடைபெற்ற கூட்டத்தில் முதலமைச்சர் விஜய் பல்வேறு முக்கிய அறிவிப்புகளை வெளியிட்டார்.

நெல்லுக்கு குவிண்டாலுக்கு ரூ.289 வரை ஊக்கத்தொகை

வரும் செப்டம்பர் 1-ம் தேதி நெல் கொள்முதல் பருவம் தொடங்க உள்ள நிலையில், மத்திய அரசின் குறைந்தபட்ச ஆதரவு விலையுடன் மாநில அரசின் ஊக்கத்தொகையும் உயர்த்தி வழங்கப்படும் என முதலமைச்சர் அறிவித்தார்.

இதன்படி, சன்னரக நெல்லுக்கு குவிண்டாலுக்கு ரூ.2,750 மற்றும் பொது ரக நெல்லுக்கு ரூ.2,600 வழங்கப்படும் என தெரிவிக்கப்பட்டுள்ளது.

மாநில அரசின் ஊக்கத்தொகை சன்னரக நெல்லுக்கு குவிண்டாலுக்கு ரூ.289 ஆகவும், பொது ரக நெல்லுக்கு ரூ.159 ஆகவும் உயர்த்தப்பட்டுள்ளது.

கரும்புக்கு டன்னுக்கு ரூ.4,000

2025-26 கரும்பு அறுவை பருவத்தில் சர்க்கரை ஆலைகளில் பதிவு செய்துள்ள கரும்பு விவசாயிகளுக்கு மத்திய அரசு நிர்ணயித்துள்ள டன்னுக்கு ரூ.3,290.50-க்கு மேலாக, தமிழ்நாடு அரசின் சிறப்பு ஊக்கத்தொகையாக ரூ.709.50 வழங்கப்படும் என முதலமைச்சர் அறிவித்தார்.

இதன் மூலம் கரும்பு விவசாயிகளுக்கு ஒரு டன்னுக்கு மொத்தம் ரூ.4,000 கிடைக்கும்.

“விவசாயிகள் நலனே முக்கியம்”

சட்டப்பேரவையில் பேசிய முதலமைச்சர் விஜய், நெல் மற்றும் கரும்பு சாகுபடி முதல் அறுவடை, விற்பனை வரை விவசாயிகள் தங்களது உழைப்பையும் பொருளாதார வளங்களையும் முழுமையாக செலவிடுவதாக குறிப்பிட்டார்.

மாநிலத்தின் நிதிநிலை சவால்களை எதிர்கொண்டாலும், விவசாயிகளின் நலனை பாதுகாக்கும் வகையில் நெல் மற்றும் கரும்புக்கான மாநில அரசின் ஊக்கத்தொகையை வரலாறு காணாத அளவுக்கு உயர்த்த முடிவு செய்யப்பட்டுள்ளதாக அவர் தெரிவித்தார்.

விவசாயிகள் வரவேற்பு

முதலமைச்சரின் அறிவிப்புக்கு ஆளும் கட்சி மற்றும் கூட்டணி கட்சிகள் வரவேற்பு தெரிவித்துள்ளன. விவசாயிகள் மத்தியில் இந்த அறிவிப்பு வரவேற்பை பெற்றுள்ள நிலையில், நெல்லுக்கான ஊக்கத்தொகையை மேலும் உயர்த்தியிருக்கலாம் என்ற கருத்தும் சில விவசாயிகள் தரப்பில் முன்வைக்கப்பட்டுள்ளது.

மாநில அரசின் நெல் ஊக்கத்தொகை ஒரே ஆண்டில் ரூ.156 வரை உயர்த்தப்படுவது இதுவே முதல்முறை என அரசு தரப்பில் தெரிவிக்கப்பட்டுள்ளது.