சென்னை: தமிழக சட்டப்பேரவையில் 2026–27 ஆம் ஆண்டுக்கான பொது பட்ஜெட்டை தாக்கல் செய்து உரையாற்றிய நிதியமைச்சர் மரிய வில்சன், மாநிலத்தின் தற்போதைய நிதி நிலை, கடன் சுமை, அரசின் வருவாய் உயர்த்தும் நடவடிக்கைகள் மற்றும் தேர்தல் வாக்குறுதிகளை படிப்படியாக நிறைவேற்றும் அரசின் உறுதிப்பாடு குறித்து விரிவாக விளக்கமளித்தார்.

பட்ஜெட் உரையின் நிறைவுப் பகுதியில் பேசிய அவர், தமிழ்நாடு கடுமையான நிதி நெருக்கடியை எதிர்கொண்டு வரும் நிலையில், மக்கள் நலத் திட்டங்களையும் நிதி ஒழுங்கையும் ஒருங்கிணைத்து செயல்படுத்துவது அரசின் முக்கிய நோக்கமாக இருப்பதாக தெரிவித்தார்.

நிதியமைச்சரின் கூற்றுப்படி, கடந்த ஐந்து ஆண்டுகளில் மாநிலத்தின் மொத்த கடன் இருமடங்காக உயர்ந்து ரூ.10 லட்சம் கோடியை எட்டியுள்ளது. ஆட்சி பொறுப்பேற்ற உடனேயே வெளியிடப்பட்ட நிதி மேலாண்மை குறித்த வெள்ளை அறிக்கையின் மூலம் இந்த நிலை மக்களுக்கு வெளிப்படையாக தெரிவிக்கப்பட்டதாக அவர் குறிப்பிட்டார்.

மேலும், மாநில மொத்த உள்நாட்டு உற்பத்தியில் சொந்த வரி வருவாய் விகிதம், வருவாய் பற்றாக்குறை, நிதிப் பற்றாக்குறை உள்ளிட்ட முக்கிய நிதிக் குறியீடுகளில் தமிழ்நாடு, பிற முன்னணி மாநிலங்களை விட பின்தங்கியிருப்பதாகவும், அரசின் மொத்த வரி வருவாயில் பெரும் பகுதி வட்டி செலுத்துவதற்கும் கட்டாயச் செலவுகளுக்கும் பயன்படுத்தப்படுவதால் புதிய திட்டங்களுக்கு தேவையான நிதி குறைவாக இருப்பதாகவும் விளக்கமளித்தார்.

இருப்பினும், மக்களுக்கு தேர்தலில் அளிக்கப்பட்ட அனைத்து வாக்குறுதிகளும் கட்டம் கட்டமாக நிறைவேற்றப்படும் என்றும், அதே நேரத்தில் மாநிலத்தின் பொருளாதார நிலையை வலுப்படுத்தும் நடவடிக்கைகளும் தீவிரமாக மேற்கொள்ளப்பட்டு வருவதாக அவர் உறுதியளித்தார்.

அரசு வருவாயை உயர்த்துவதற்கான முக்கியமான நிர்வாகச் சீர்திருத்தங்களையும் அமைச்சர் பட்டியலிட்டார். பொது டெண்டர்களில் தேவையற்ற சான்றிதழ்களை கட்டாயமாக கோரிய நடைமுறை நீக்கப்பட்டதால், டெண்டர் செயல்முறையில் வெளிப்படைத்தன்மை அதிகரித்துள்ளதாக அவர் தெரிவித்தார். இதன் மூலம் அதிக நிறுவனங்கள் போட்டியிடும் சூழல் உருவாகி, அரசுக்கு செலவுக் குறைவு ஏற்படும் என்றும் கூறினார்.

அதேபோல், முன்பு ஒரு குறிப்பிட்ட துறையில் பதிவு செய்யப்பட்ட ஒப்பந்ததாரர்கள் மட்டுமே அந்தத் துறையின் டெண்டர்களில் பங்கேற்க முடிந்த நிலை மாற்றப்பட்டுள்ளது. தற்போது எந்தத் துறையில் பதிவு செய்திருந்தாலும் தகுதி பெற்ற ஒப்பந்ததாரர்கள் பிற துறைகளின் டெண்டர்களிலும் பங்கேற்கும் வாய்ப்பு வழங்கப்பட்டுள்ளதாக அவர் தெரிவித்தார்.

இளைஞர்கள், புதிய தொழில் முனைவோர் மற்றும் சிறு தொழில்முனைவோர்களுக்கு அரசு ஒப்பந்தப் பணிகளில் அதிக வாய்ப்பு வழங்கும் நோக்கில் குறைந்த மதிப்புள்ள டெண்டர்களில் இருந்த பல்வேறு நிபந்தனைகள் தளர்த்தப்பட்டுள்ளதாகவும் அமைச்சர் கூறினார். இந்த மாற்றங்கள் மூலம் புதிய நிறுவனங்கள் அரசுப் பணிகளில் பங்கேற்கும் வாய்ப்பு பெருகுவதோடு, போட்டி அதிகரிப்பதால் அரசின் செலவுகளும் குறையும் என்று அவர் விளக்கமளித்தார்.

மேலும், அரசு பொறுப்பேற்பதற்கு முன்பு சில தனிநபர்கள் மற்றும் குறிப்பிட்ட அரசியல் வட்டாரங்களிடம் மட்டுமே டெண்டர் ஒப்பந்தங்கள் சென்றதாக குற்றம்சாட்டிய அமைச்சர், தற்போதைய அரசு வெளிப்படையான நடைமுறைகளை அமல்படுத்தி அந்த நிலைக்கு முற்றுப்புள்ளி வைத்துள்ளதாக தெரிவித்தார்.

கட்டுமானத் துறையிலும் முக்கிய மாற்றங்கள் கொண்டுவரப்பட்டுள்ளதாக அவர் குறிப்பிட்டார். பல அடுக்கு மற்றும் உயரமான குடியிருப்பு கட்டிடங்களுக்கு அனுமதி பெற அரசை நேரடியாக அணுக வேண்டிய நடைமுறை மாற்றப்பட்டு, அதிகாரப் பகிர்ந்தளிப்பு முறையின் மூலம் சென்னை பெருநகர வளர்ச்சிக் குழும (CMDA) மட்டத்திலேயே அனுமதி வழங்கும் நடைமுறை அமல்படுத்தப்பட்டுள்ளதாக தெரிவித்தார். இதன் மூலம் திட்ட அனுமதிகளில் நிலவிய தாமதமும், ஊழல் குற்றச்சாட்டுகளும் குறையும் என அவர் நம்பிக்கை தெரிவித்தார்.

"மக்களின் வரிப்பணத்தில் இருந்து ஒரு பைசாவும் வீணாகக் கூடாது என்ற உறுதியுடன் அரசு செயல்பட்டு வருகிறது. அரசின் ஒவ்வொரு ரூபாயும் மக்களின் நலனுக்கே பயன்படுத்தப்படும். ஊழலுக்கு எந்தவித சமரசமும் இல்லை என்பதில் முதல்வர் உறுதியாக உள்ளார்," என்று அமைச்சர் தனது உரையில் வலியுறுத்தினார்.

வருவாய் உயர்த்தும் முயற்சிகளின் ஒரு பகுதியாக மதுபான உற்பத்தியாளர்களுக்கு கூடுதல் சிறப்புக் கட்டணம் விதிக்கப்பட்டுள்ளதாகவும், இதன் மூலம் ஆண்டுக்கு சுமார் ரூ.1,000 கோடி கூடுதல் வருவாய் கிடைக்கும் என எதிர்பார்க்கப்படுவதாகவும் அவர் தெரிவித்தார்.

மேலும், சரக்கு மற்றும் சேவை வரி (GST) மதிப்பீடுகளில் தகவல் தொழில்நுட்ப பயன்பாடு, பதிவுத்துறையில் நேரடி தொடர்பில்லா பத்திரப் பதிவு முறை, சுரங்கத் துறையின் முழுமையான கணினிமயமாக்கல் உள்ளிட்ட பல்வேறு டிஜிட்டல் சீர்திருத்தங்கள் மேற்கொள்ளப்பட்டுள்ளதாகவும், இவற்றின் மூலம் ஆண்டுக்கு கூடுதலாக சுமார் ரூ.15,000 கோடி வரை அரசுக்கு வருவாய் கிடைக்கும் என அரசு கணித்துள்ளதாகவும் அவர் கூறினார்.

மாநிலத்தின் வரி மற்றும் வரியல்லாத வருவாய் ஆதாரங்களை விரிவுபடுத்தி நீடித்த பொருளாதார வளர்ச்சியை உருவாக்கும் நோக்கில், ஒன்றிய திட்ட ஆணையத்தின் முன்னாள் துணைத் தலைவர் மாண்டேக் சிங் அலுவாலியா தலைமையில் ஐந்து உறுப்பினர்களைக் கொண்ட வருவாய் மேம்பாட்டுக் குழு அமைக்கப்பட்டுள்ளதாகவும் அமைச்சர் தெரிவித்தார்.

இந்தக் குழு வழங்கும் பரிந்துரைகளின் அடிப்படையில் மாநிலத்தின் நிதி சுயாட்சியை மேலும் வலுப்படுத்தி, சமூக மற்றும் பொருளாதார வளர்ச்சித் திட்டங்களுக்கு தேவையான நிதி ஆதாரங்களை உறுதிப்படுத்த அரசு நடவடிக்கை எடுக்கும் என்றும் அவர் கூறினார்.

பட்ஜெட் உரையை நிறைவு செய்த நிதியமைச்சர், நிதி ஒழுங்கு, வெளிப்படையான நிர்வாகம், ஊழல் தடுப்பு, வருவாய் உயர்வு மற்றும் மக்கள் நலத் திட்டங்களை ஒருங்கிணைத்து செயல்படுத்துவதன் மூலம் தமிழ்நாட்டை வலுவான பொருளாதார பாதையில் முன்னேற்ற அரசு உறுதியுடன் செயல்படும் என்று தெரிவித்தார்.