செங்கோட்டையன் தனது ஆதரவாளர்களுடன் இன்று தமிழக வெற்றிக்கழகத்தில் இணைகிறார் . அதேபோல் புதுச்சேரியிலும் முன்னாள் பாஜக தலைவர், முன்னாள் எம் எல் ஏ ஆகியோரும் இணைகின்றனர் .

அதிமுக முன்னாள் அமைச்சர் செங்கோட்டையன் இன்று காலை 10 மணிக்கு தமிழக வெற்றிக் கழகத்தில் (தவெக) இணைய உள்ளார். அவருடன் அவரது ஆதரவாளர்களும், புதுச்சேரி பாஜக முன்னாள் தலைவர் சுவாமிநாதன், காரைக்கால் முன்னாள் எம்.எல்.ஏ ஹஸனா ஆகியோரும் விஜய் முன்னிலையில் தவெகவில் இணைய உள்ளனர்.

அதிமுகவுடன் கூட்டணி

கரூர் சம்பவம் எதிர்ப்புகளுக்கு மத்தியில், உச்ச நீதிமன்ற தீர்ப்புக்குப் பிறகு உற்சாகமடைந்த விஜய், மீண்டும் மக்கள் சந்திப்பைத் தொடங்கி, திமுகவை கடுமையாக விமர்சித்து வருகிறார். அதிமுகவுடன் கூட்டணி அமைக்கலாம் என்ற எதிர்பார்ப்புகளுக்கு மத்தியில், எடப்பாடி பழனிச்சாமியால் கட்சியிலிருந்து வெளியேற்றப்பட்ட செங்கோட்டையன் தவெகவில் இணைவது, அதிமுக உடனான கூட்டணிக்கு முற்றுப்புள்ளி வைத்துள்ளது.

எம்.எல்.ஏ பதவி ராஜினாமா

செங்கோட்டையன் கடந்த ஒரு மாதமாக ஆலோசனைகளில் ஈடுபட்டிருந்த நிலையில், அவர் திமுகவில் இணையலாம் என முதலில் கூறப்பட்டது. ஆனால், திடீரென அவர் தனது எம்.எல்.ஏ பதவியை ராஜினாமா செய்து, தமிழக வெற்றிக் கழகத்தில் இணைய முடிவெடுத்துள்ளார். கட்சித் தாவல் தடைச் சட்டத்தின்படி, தேர்ந்தெடுக்கப்பட்ட எம்.எல்.ஏக்கள் மாற்றுக் கட்சியில் இணைய முடியாது. ஆனால், கட்சியிலிருந்து வெளியேற்றப்பட்டதால், செங்கோட்டையன் இரட்டை இலை சின்னத்தில் கிடைத்த எம்.எல்.ஏ பதவியை உதறிவிட்டு, தவெகவில் இணைய உள்ளார். கடைசி நேரத்தில் அமைச்சர் சேகர்பாபு அவரைச் சந்தித்தபோதும், அவர் விஜயை நேரில் சந்தித்து தவெகவில் இணைவதை உறுதிப்படுத்தியுள்ளார்.

அதிமுக முக்கியப் புள்ளிகள்

செங்கோட்டையனுடன் ஈரோடு மற்றும் கோபிசெட்டிபாளையத்தைச் சேர்ந்த பல அதிமுக முக்கியப் புள்ளிகளும் தவெகவில் இணைய உள்ளனர். முன்னாள் எம்.பி. சத்தியபாமா, அதிமுக ஈரோடு புறநகர் மேற்கு மாவட்ட முன்னாள் பொருளாளர் கந்தவேல் முருகன், நம்பியூர் அதிமுக முன்னாள் ஒன்றியச் செயலாளர் சுப்பிரமணியம், கோபி மேற்கு ஒன்றியத்தைச் சேர்ந்த குறிஞ்சிநாதன், முன்னாள் யூனியன் தலைவர்கள் மௌடீஸ்வரன், பி.யூ.முத்துசாமி, அத்தாணி பேரூர் கழகச் செயலாளர் எஸ்.எஸ்.ரமேஷ் ஆகியோர் இதில் அடங்குவர். இதனைத்தொடர்ந்து 500 ஆதரவாளர்களும் இணைகின்றனர். இவ்வாறு இருக்கும் நிலையில் இன்று காலை 10.30 மணிக்கு அவர் செய்தியாளர்களை சந்திக்கிறார். அதில் தவெகவில் இணைவதற்கான காரணத்தை கூறுவார் என்று எதிர்பார்க்கப்படுகிறது.