எல் முருகனுக்கு ரூ. 2.64 கோடி மதிப்பில் சொத்து
தமிழ்நாட்டில் திருப்பூர் மாவட்டம் தாராபுரம் தொகுதியில் போட்டியிடும் பாரதிய ஜனதா கட்சியின் மாநில தலைவர் எல். முருகன் தனது வேட்பு மனுவை வியாழக்கிழமை தாக்கல் செய்துள்ளார். இதையொட்டி அவர் தாக்கல் செய்துள்ள பிரமாண பத்திரத்தில் அவரது அசையா சொத்து, அசையும் சொத்து என மொத்தம் ரூ. 2.64 கோடி இருப்பதாக கூறியுள்ளார்.
தனது கையிருப்பு தொகையாக ரூ. 45 ஆயிரமும் தனது மனைவியிடம் ரூ. 75 ஆயிரம் இருப்பதாகவும் முருகன் கூறியுள்ளார். பாரதிய ஜனதா கட்சியின் மாநில தலைவராக முருகன் நியமிக்கப்படுவதற்கு முன்பு அவர் தேசிய தாழ்த்தப்பட்டோர் ஆணையத்தின் துணைத் தலைவராக இருந்தார். அவர் கடந்த 2016-17 நிதியாண்டில் ரூ. 7.04 லட்சம், 2017-18இல் 5.12 லட்சம், 2018-19இல் ரூ. 25.99 லட்சம், 2019-20இல் ரூ. 29.18 லட்சம், 2020-21இல் ரூ. 29.85 லட்சம் என்றவாறு வருமான வரி தாக்கல் செய்துள்ளார். மேலும், தன் மீது 23 குற்றவியல் வழக்குகள் நிலுவையில் உள்ளதாகவும் முருகன் வேட்பு மனுவில் கூறியுள்ளார்.
