அயோத்தி ராமர் கோயில் காணிக்கை மோசடி: விசாரணை தீவிரம் – பலர் கைது, ஊழியர்கள் ராஜினாமா
உத்தரப் பிரதேச மாநிலம் அயோத்தியில் உள்ள ராமர் கோயிலில் காணிக்கை மற்றும் நன்கொடை நிதி தொடர்பாக முறைகேடு நடைபெற்றதாக எழுந்த புகாரைத் தொடர்ந்து, சிறப்புப் படையினர் தீவிர விசாரணை மேற்கொண்டு வருகின்றனர்.
இந்த வழக்கில் இதுவரை 8-க்கும் மேற்பட்டோர் கைது செய்யப்பட்டுள்ளதாக தகவல்கள் தெரிவிக்கின்றன. விசாரணையில், காணிக்கை எண்ணும் பணியில் ஈடுபட்டிருந்த சில ஊழியர்கள் பணத்தை முறைகேடாக பயன்படுத்தியிருப்பது தெரியவந்துள்ளதாக கூறப்படுகிறது. மேலும், பல கோடி ரூபாய் மதிப்பிலான நிதி மற்றும் தங்கம், வெள்ளி பொருட்கள் தொடர்பாகவும் விசாரணை நடைபெற்று வருகிறது.
இந்த சம்பவத்தைத் தொடர்ந்து, காணிக்கை எண்ணும் பிரிவில் பணியாற்றிய 50 சதவீதத்திற்கும் அதிகமான ஊழியர்கள் தங்கள் பணியை ராஜினாமா செய்துள்ளதாக கோயில் நிர்வாகம் தெரிவித்துள்ளது. விசாரணை தங்களையும் பாதிக்கக்கூடும் என்ற அச்சமே இதற்குக் காரணம் என கூறப்படுகிறது.
முன்னதாக இரண்டு ஷிப்டுகளில் நடைபெற்ற காணிக்கை எண்ணும் பணி, தற்போது பணியாளர் பற்றாக்குறை காரணமாக ஒரே ஷிப்டில் நடைபெற்று வருகிறது. இதனால் பணியாளர்கள் 9 முதல் 10 மணி நேரம் வரை தொடர்ந்து பணியாற்ற வேண்டிய சூழல் ஏற்பட்டுள்ளதாகவும் தெரிவிக்கப்பட்டுள்ளது.
இந்த வழக்கில் தொடர்புடையவர்கள் குறித்து தொடர்ந்து விசாரணை நடைபெற்று வருவதால், மேலும் முக்கிய தகவல்கள் வெளியாகும் என அதிகாரிகள் தெரிவித்துள்ளனர்.
