சென்னை: தவெகவின் தலைவருமான விஜய், மக்களை சந்திப்பதற்காக கரூருக்கு சென்றபோது நிகழ்ந்த கூட்ட நெரிசல் சம்பவம் தமிழகத்தை உலுக்கியது. அந்த நிகழ்வில் 41 பேர் உயிரிழந்தது பெரும் அதிர்ச்சியை ஏற்படுத்தியது. இதனால் விஜயும், தவெக நிர்வாகிகளும் மனரீதியாக பெரும் தாக்கத்துக்குள்ளானார்கள்.

கரூர் சம்பவத்திற்கு பிறகு, விஜயை குறிவைத்து எதிரணிகள் கடுமையான விமர்சனங்களை முன்வைத்தனர். குறிப்பாக திமுகவினர், "விஜய்தான் முழு பொறுப்பு" என கூறி அவரை திட்டித் தாக்கினர். மேலும், அவர் உடனே பாதிக்கப்பட்ட குடும்பங்களைச் சந்திக்கவில்லை என்றும் குற்றஞ்சாட்டினர். ஆனால், சில தொழில்நுட்ப மற்றும் பாதுகாப்பு காரணங்களால் விஜய் அப்போது சென்று சந்திக்க முடியாதது பின்னர் வெளிச்சமிட்டது.

அதனைத் தொடர்ந்து சென்னையில், கரூர் சம்பவத்தில் உயிரிழந்த 38 குடும்பத்தினரை விஜய் நேரில் சந்தித்து ஆறுதல் கூறினார். அவர்களிடம் பேசும் போது அவர் கண்கலங்கினார் என்றும், அவர்களின் துயரத்தை பகிர்ந்துகொண்டார் என்றும் தகவல்கள் தெரிவிக்கின்றன. அதோடு, பாதிக்கப்பட்ட 41 குடும்பங்களின் வங்கி கணக்குகளில் தலா ரூ.20 லட்சம் வீதம் நிதியுதவி வழங்கப்பட்டது.

இந்த நடவடிக்கை பலரிடமிருந்து பாராட்டுகளை பெற்றது. "விஜய் ஒரு அரசியல்வாதி மட்டுமல்ல, மனம் கொண்ட மனிதர்" என பலர் சமூக வலைதளங்களில் பதிவிட்டனர். இதையடுத்து, விஜய் மீண்டும் கட்சி பணிகளை சுறுசுறுப்பாக மேற்கொள்ளத் தொடங்கினார். மாநிலம் முழுவதும் புதிய அமைப்புகள், குழுக்கள், மாவட்டச் செயலாளர்கள் நியமனம் போன்றவை தொடர்ந்து நடந்து வருகின்றன.

இந்நிலையில், தவெகவின் சிறப்பு பொதுக்குழு கூட்டம் இன்று மாமல்லபுரத்தில் உள்ள ஒரு நட்சத்திர ஹோட்டலில் விஜயின் தலைமையில் நடைபெற்றது. கூட்டத்தில் மாநிலம் முழுவதும் இருந்து சுமார் 2000 நிர்வாகிகள் கலந்து கொண்டனர். கூட்டம் துவங்கியதும் கரூர் சம்பவத்தில் உயிரிழந்தவர்களுக்கு இரங்கல் தெரிவிக்கும் வகையில் மௌன அஞ்சலி செலுத்தப்பட்டது.

அதன்பின், பல முக்கிய தீர்மானங்கள் நிறைவேற்றப்பட்டன. மொத்தம் 12 தீர்மானங்கள் நிறைவேற்றப்பட்டதாக கட்சி வட்டாரங்கள் தெரிவித்துள்ளன. அதில் முக்கியமானது, 2026 ஆம் ஆண்டு நடைபெறவுள்ள சட்டமன்றத் தேர்தலில், கூட்டணி அமைப்பது உள்ளிட்ட அனைத்து முடிவுகளையும் எடுக்க தவெக தலைவர் விஜய்க்கு முழு அதிகாரம் வழங்கும் தீர்மானம் ஆகும்.

மேலும், கட்சியின் முதலமைச்சர் வேட்பாளராக விஜயை அறிவிக்கும் தீர்மானமும் ஒருமனதாக நிறைவேற்றப்பட்டது. இதனால் கூட்டத்தில் கலந்து கொண்ட நிர்வாகிகள் உற்சாகக் கோஷங்கள் எழுப்பினர். "விஜய் முதல்வர்" என முழக்கங்கள் ஒலித்தன.

கரூர் சம்பவத்திற்கு பிறகு எந்தப் பொது நிகழ்ச்சிகளிலும் கலந்து கொள்ளாமல் இருந்த விஜய், இக்கூட்டத்தில் பங்கேற்றது கட்சியினருக்கு புதிய உற்சாகத்தைக் கொடுத்தது. அவரது வருகையால் அரங்கமே கைதட்டல்களால் அதிர்ந்தது.

கூட்டத்தில் கட்சியின் எதிர்காலத் திட்டங்கள், வளர்ச்சி, மக்கள் தொடர்பு முறை, சமூக ஊடக அணுகுமுறை, மற்றும் 2026 தேர்தல் வியூகங்கள் பற்றிய விரிவான விவாதம் நடைபெற்றது. விஜய் தனது உரையில், “இந்த முறை நாம் வெற்றி பெற வேண்டியது மக்கள் நலனுக்காக. யாரையும் எதிர்க்காமல், உண்மையையும் உழைப்பையும் ஆயுதமாக எடுத்துக் கொள்ள வேண்டும்” என்று கூறியதாக தகவல்கள் தெரிவிக்கின்றன.

ஒருபுறம், விஜயை அதிமுக-பாஜக கூட்டணிக்கு இழுக்கும் முயற்சிகள் நடந்து வந்த நிலையில், முதலமைச்சர் வேட்பாளராக விஜய் தேர்ந்தெடுக்கப்பட்டிருப்பது, அந்த அழைப்பை தவெக நிராகரித்திருப்பதையே வெளிப்படுத்துகிறது.

இதனால், தமிழ் அரசியலில் புதிய திருப்பம் ஏற்படும் சாத்தியம் அதிகரித்துள்ளது.