43-க்கும் மேற்பட்ட ரெய்டுகள்

இந்த புதிய Wonderla பூங்கா, சென்னையின் பொழுதுபோக்கு தேவைகளை பூர்த்தி செய்யும் ஒரு முக்கிய இடமாக மாறியுள்ளது. இங்கு 43க்கும் மேற்பட்ட ரைடுகள் உள்ளன. இதில் அதிவேக ரோலர் கோஸ்டர்கள், சுழலும் சவாரிகள், குழந்தைகளுக்கான மென்மையான ரைடுகள் மற்றும் பெரிய வாட்டர் ஸ்லைடுகள் என அனைத்தும் அடங்கும். குறிப்பாக, இந்தியாவின் முதல் Bolliger & Mabillard இன்வெர்ட்டட் ரோலர் கோஸ்டரான 'தஞ்சோரா' (Tanjora) பலமுறை தலைகீழாக சுழன்று சாகச அனுபவத்தை தருகிறது. மேலும், 50 மீட்டர் உயரத்தில் இருக்கும் 'ஸ்பின் மில்' (Spin Mill) என்ற ரைடு, இந்தியாவில் உள்ள மிக உயரமான சுழலும் ரைடு ஆகும். இது மக்களை செங்குத்தான வளையங்களில் 4.5G விசையுடன் சுழற்றி அதிரவைக்கிறது.

ஸ்கை ரயில்

மெதுவான மற்றும் ரம்மியமான அனுபவத்தை விரும்புவோருக்காக, 'ஸ்கை ரயில்' (Sky Rail) என்ற 540 மீட்டர் உயரமான மோனோரயில் வசதி உள்ளது. இது பூங்காவின் மேல் பகுதியில் வலம் வந்து, பூங்காவின் அழகிய காட்சிகளை அமர்ந்து ரசிக்க உதவுகிறது. சில ரைடுகள் இன்னும் கட்டுமானத்திலும், இறுதி சோதனையிலும் இருந்தாலும், பூங்கா முழுவதும் இன்று முதல் பொதுமக்கள் பயன்பாட்டுக்கு திறக்கப்படுகிறது.

பொது பேருந்து சேவைகள்

இந்த பூங்காவிற்கு செல்வதை எளிதாக்க, Wonderla நிர்வாகம் தமிழக அரசுடன் இணைந்து செயல்பட்டு வருகிறது. சென்னைக்கு வெளியே, இல்லளூர் என்ற இடத்தில் அமைந்துள்ள இந்த பூங்காவிற்கு செல்ல, பல பகுதிகளில் இருந்து பொது பேருந்து சேவைகளை அறிமுகப்படுத்த திட்டமிட்டுள்ளனர். இது நீண்ட தூர பயணத்தின் சிரமத்தையும், பார்க்கிங் பிரச்சனைகளையும் குறைக்கும். மேலும், இந்த பேருந்துகளில் வருவோருக்கு டிக்கெட் விலையில் தள்ளுபடியும் வழங்கப்படும். இது குடும்பங்கள், மாணவர்கள் மற்றும் பட்ஜெட் பயணிகளுக்கு பூங்காவை அணுகக்கூடியதாக மாற்றும்.

மக்கள் பாதுகாப்பு

பாதுகாப்பு விஷயத்தில் Wonderla மிகுந்த கவனம் செலுத்துகிறது. "நாங்கள் 25 வருடங்களாக பொழுதுபோக்கு பூங்காக்களை நடத்தி வருகிறோம். ரைடுகள் எப்படி இயங்குகின்றன, நீர் அமைப்புகள் மற்றும் பாதுகாப்பு நடவடிக்கைகள் பற்றி எங்களுக்கு நன்றாக தெரியும். ஒவ்வொரு ரைடும், ஒவ்வொரு அமைப்பும் சர்வதேச தரத்தில் சான்றளிக்கப்பட்டுள்ளன. விருந்தினர்கள் வயிற்றில் பட்டாம்பூச்சிகள் பறப்பதை மட்டுமே உணர வேண்டும், பயத்தை அல்ல. ஏனெனில் அனைத்தும் உலகத் தரத்தில் கட்டப்பட்டுள்ளன" என்று அருண் கே. சிட்டிலப்பள்ளி, நிர்வாகத் தலைவர் மற்றும் மேலாண்மை இயக்குநர், Wonderla Holidays கூறினார். இங்குள்ள நீர் மூன்று கட்ட சுத்திகரிப்பு செயல்முறைக்கு உட்படுத்தப்பட்டு, குடிநீரை விட தூய்மையாக இருப்பதை உறுதி செய்கிறது. ஒவ்வொரு ரைடும் ஆயிரக்கணக்கான சோதனை ஓட்டங்களுக்குப் பிறகு, சிறந்த அனுபவத்தை வழங்க சரிசெய்யப்பட்டுள்ளது.

நிழலான பாதைகள்

சென்னையின் மதிய வெயிலில் இருந்து தப்பிக்க, பூங்காவில் நிழலான பாதைகள் மற்றும் தட்பவெப்ப நிலைக்கு ஏற்ப வடிவமைக்கப்பட்ட பகுதிகள் அடுத்த சில மாதங்களில் உருவாக்கப்படும். குழந்தைகளுக்கான தனி இடங்கள், சக்கர நாற்காலி வசதி மற்றும் முதியோர்களுக்கான நிழலான ஓய்வு இடங்கள் என அனைத்து தரப்பினருக்கும் ஏற்ற வகையில் இந்த பூங்கா வடிவமைக்கப்பட்டுள்ளது.

தீம் உணவகங்கள்

ரைடுகளின் உற்சாகம் மட்டுமல்லாமல், இங்கு எட்டு விதமான தீம் உணவகங்கள் உள்ளன. இவை உள்ளூர் சிறப்பு உணவுகளையும், சர்வதேச உணவுகளையும் வழங்குகின்றன. மேலும், தஞ்சாவூர் பொம்மைகள், மரப்பாச்சி பொம்மைகள் மற்றும் பூங்கா தொடர்பான நினைவுப் பொருட்கள் விற்கப்படும் கடைகளும் உள்ளன. உங்கள் உடைமைகளை பாதுகாப்பாக வைக்க லாக்கர்களும் வழங்கப்படுகின்றன. இதனால், நீங்கள் கவலையின்றி ரைடுகளை அனுபவிக்கலாம்.

ஆன்லைன் டிக்கெட்டுகள்

டிக்கெட்டுகள் ஆன்லைனில் கிடைக்கின்றன. பெரியவர்களுக்கு ₹1,508, குழந்தைகளுக்கு ₹1,205 மற்றும் மூத்த குடிமக்களுக்கு ₹1,130 என கட்டணம் நிர்ணயிக்கப்பட்டுள்ளது. வார நாட்களில் காலை 11 மணி முதல் மாலை 6 மணி வரையிலும், வார இறுதி நாட்களில் காலை 11 மணி முதல் இரவு 7 மணி வரையிலும் பூங்கா திறந்திருக்கும்.