ஏர் இந்தியா நிறுவனத்துக்குச் சொந்தமான போயிங் B787-8 ரக விமானம் (VT-ANX) தொடர்பாக, பிப்ரவரி 1 ஆம் தேதி இரண்டு முறை எரிபொருள் கட்டுப்பாட்டு ஸ்விட்சில் கோளாறு ஏற்பட்டதாக விமானப் பணியாளர்கள் தெரிவித்திருந்தனர். இதனைத் தொடர்ந்து, அந்த ஸ்விட்சில் இயந்திர அல்லது மின்சார குறைபாடு இருப்பதாக செய்திகள் வெளியாகின. இந்நிலையில், அந்த குற்றச்சாட்டுகளை மறுக்கும் வகையில் DGCA விளக்க அறிக்கை ஒன்றை வெளியிட்டது.

குற்றச்சாட்டுக்கு மறுப்பு

DGCA கூறுகையில், எரிபொருள் கட்டுப்பாட்டு ஸ்விட்ச் RUN நிலையிலிருந்து CUTOFF நிலைக்கு மாறியதற்கு தொழில்நுட்பக் கோளாறு காரணமல்ல என்றும், தவறான திசையில் வெளிப்புற அழுத்தம் செலுத்தப்பட்டதே முக்கிய காரணம் என்றும் தெரிவித்துள்ளது. இடது மற்றும் வலது பக்கங்களில் உள்ள இரு ஸ்விட்சுகளும் பரிசோதனை செய்யப்பட்டபோது, அவை முறையாக செயல்படக்கூடிய நிலையில் இருந்ததாகவும், லாக்கிங் அமைப்பு சரியாக பொருத்தப்பட்டிருந்ததாகவும் DGCA தெரிவித்தது.

DGCA விளக்கம்

ஸ்விட்சின் அடிப்பலகைக்கு இணையான திசையில் அழுத்தம் கொடுக்கப்பட்டபோது அது உறுதியாக இருந்ததாகவும், ஆனால் தவறான கோணத்தில் விரல் அல்லது பெருவிரலால் அழுத்தப்பட்டால், அதன் கோண வடிவமைப்பு காரணமாக அது எளிதாக RUN நிலையிலிருந்து CUTOFF நிலைக்கு நகர வாய்ப்புள்ளதாகவும் விளக்கத்தில் கூறப்பட்டுள்ளது.

விமானியின் புகார்

இந்த விவகாரம் வெளியானதற்கு முன்னதாக, போயிங் 787-8 விமானத்தின் எரிபொருள் கட்டுப்பாட்டு ஸ்விட்சில் கோளாறு இருப்பதாக ஏர் இந்தியா நிறுவனத்தின் ஒரு விமானி புகார் அளித்திருந்தார். அந்த தகவல் கிடைத்தவுடன், பாதுகாப்பு காரணமாக அந்த விமானத்தை உடனடியாக தரையில் நிறுத்தியதாக ஏர் இந்தியா தெரிவித்தது. மேலும், இந்த விவகாரம் நாட்டின் விமானப் போக்குவரத்து ஒழுங்குமுறை அமைப்பான DGCA-க்கு அறிவிக்கப்பட்டதாகவும் கூறப்பட்டது.

விசாரணை தொடக்கம்

ஏர் இந்தியா நிறுவனத்தின் செய்தித் தொடர்பாளர், விமானியின் சந்தேகங்களை தீவிரமாக எடுத்துக் கொண்டு, விமானத்தை தயாரித்த அசல் உபகரண உற்பத்தியாளர் நிறுவனத்துடன் (OEM) இணைந்து விசாரணை நடத்தி வருவதாக தெரிவித்தார்.

ஏர் இந்தியா வலியுறுத்தல்

முன்னுரிமை அடிப்படையில் இந்த பிரச்சினை ஆய்வு செய்யப்படுவதாகவும், DGCA வழங்கிய உத்தரவின்படி, ஏர் இந்தியாவின் படையணியில் உள்ள அனைத்து போயிங் 787 விமானங்களிலும் ஏற்கனவே எரிபொருள் கட்டுப்பாட்டு ஸ்விட்சுகள் பரிசோதிக்கப்பட்டு, எந்த குறையும் கண்டறியப்படவில்லை என்றும் அவர் கூறினார். பயணிகளின் மற்றும் விமானப் பணியாளர்களின் பாதுகாப்பே நிறுவனத்தின் முதன்மை நோக்கம் எனவும் ஏர் இந்தியா வலியுறுத்தியது.

மின்சார கோளாறுகள்

இதற்கிடையே, இந்திய விமானிகள் பேரமைப்பின் தலைவர் கேப்டன் சி.எஸ். ரந்தாவா, இந்த சம்பவம் தொடர்பாக கவலை வெளியிட்டார். Boeing 787 விமானங்களில் எரிபொருள் கட்டுப்பாட்டு ஸ்விட்சுகள் கட்டுப்பாடின்றி நகரும் சம்பவங்கள் மீண்டும் மீண்டும் நடைபெற்று வருவதாக அவர் குறிப்பிட்டார். இதனை ஒரு சாதாரண நிகழ்வாகக் கருதாமல், சாத்தியமான மின்சார கோளாறுகள் உள்ளதா என்பதை DGCA மற்றும் விமான விபத்து விசாரணை பணியகம் (AAIB) உடனடியாக ஆராய வேண்டும் என அவர் கோரிக்கை வைத்தார்.

ஜப்பான் சம்பவம்

மேலும், இது போன்ற சம்பவம் மூன்றாவது முறையாக பதிவாகியுள்ளதாகவும், கடந்த காலத்தில் ஜப்பானின் ஒசாகாவில் நடந்த ANA விமான சம்பவத்தையும் அவர் நினைவுபடுத்தினார். இது போன்ற தொழில்நுட்ப காரணமே, சமீபத்தில் நடந்த ஏர் இந்தியா சம்பவங்களுடனும் தொடர்புடையதாக இருக்கலாம் எனவும் அவர் கருத்து தெரிவித்தார்.