"2025-26ஆம் ஆண்டிற்கான நிதிநிலை அறிக்கையை இன்று (பிப்ரவரி 1) ஒன்றிய நிதி அமைச்சர் நிர்மலா சீதாராமன் பாராளுமன்றத்தில் தாக்கல் செய்தார். இந்த நிதிநிலை அறிக்கையில் சில வரவேற்கத்தக்க அம்சங்கள் இருந்தாலும், தமிழகத்தின் வளர்ச்சிக்கு தேவையான முக்கிய அறிவிப்புகள் செய்யப்படாதது மீண்டும் ஒருமுறை ஏமாற்றத்தையே ஏற்படுத்தியுள்ளது.

தமிழக வெற்றிக்கழகத் தலைவர் விஜய் இதுகுறித்து கண்டனம் தெரிவித்து, "ஒன்றிய அரசு தமிழ்நாட்டை தொடர்ந்து புறக்கணித்து வருகின்றது. தமிழகத்தில் மிகவும் தேவையான உள்கட்டமைப்பு திட்டங்கள், வேலை வாய்ப்பு மேம்பாட்டு திட்டங்கள், திறன் மேம்பாட்டு திட்டங்கள் போன்றவை எந்தவித நிதி ஒதுக்கீடும் இல்லாமல் விட்டுவைக்கப்பட்டுள்ளன. இது கூட்டாட்சித் தத்துவத்திற்கு எதிராகும்," என்று தெரிவித்தார்.

"நடுத்தர வர்க்க மக்களுக்கு வரிவிலக்கு அளிக்கப்பட்டிருப்பதை நாம் வரவேற்கிறோம். ஆனால், ஏழை மக்களுக்கு நேரடியாக உதவக்கூடிய பெட்ரோல், டீசல் வரி குறைப்பது போன்ற அறிவிப்புகள் எதுவும் இல்லை. இளைஞர்களுக்கு வேலை வாய்ப்புகளை அதிகரிக்கும் திட்டங்கள் அறிவிக்கப்படவில்லை. தமிழ்நாட்டிற்கு தேவைப்படும் மெட்ரோ ரயில் திட்டங்கள், புதிய ரயில்பாதைகள், சாலை திட்டங்கள் உள்ளிட்டவற்றிற்கு எந்த ஒரு அறிவிப்பும் இல்லை. இது தமிழ்நாட்டின் வளர்ச்சியை புறக்கணிப்பதாகவே அமைகிறது," என்று அவர் கூறினார்.

"தமிழ்நாட்டில் சமீபத்தில் கண்டுபிடிக்கப்பட்ட தொன்மையான இரும்பு நாகரிகத்திற்கு உரிய அங்கீகாரம் அளிக்கப்படவில்லை. மேலும், தமிழகத்தில் அகழ்வாராய்ச்சி மேற்கொள்ள எந்த நிதியும் ஒதுக்கப்படாதது வருத்தமளிக்கிறது. இது தமிழகத்தின் வரலாற்று முக்கியத்துவத்தையும் புறக்கணிப்பதாகும்," என்று அவர் தெரிவித்துள்ளார்.

"அணுஉலை மின்சாரம் தனியார் மயமாக்கப்படுவது ஆபத்தான முடிவு. சுற்றுச்சூழல் பாதுகாப்பு முக்கியத்துவம் பெறும் இந்த நேரத்தில், அணுமின் உற்பத்தியை மேலேற்றி, மாறாக புதுப்பிக்கத்தக்க ஆற்றல் முறைகளுக்கு முக்கியத்துவம் கொடுக்க வேண்டிய தருணம் இது. இதை உடனடியாக திரும்பப் பெற வேண்டும்," என்று அவர் வலியுறுத்தினார்.

"ஒன்றிய அரசு ஒட்டுமொத்த இந்தியாவின் வளர்ச்சியை கருத்தில் கொண்டு நிதிநிலை அறிக்கையை உருவாக்க வேண்டும். மாறாக, சில மாநிலங்களுக்கு மட்டும் முக்கியத்துவம் கொடுத்து, மற்ற மாநிலங்களை புறக்கணிப்பது தவறு. வழக்கம் போல இந்த ஆண்டும் தமிழகத்திற்கு போதிய நிதி ஒதுக்கீடு செய்யப்படாததும், எந்த ஒரு புதிய திட்டங்களும் அறிவிக்கப்படாததும் மிகுந்த ஏமாற்றத்தை ஏற்படுத்துகிறது," என்று விஜய் தெரிவித்தார்.