இதுகுறித்து அவர் மேலும் கூறுகையில், "விடியல் ஆட்சி தருவதாகக் கூறி ஆட்சிக்கு வந்த திமுக, நிதி நிர்வாகத்தில் தமிழகத்தை 27-ஆம் இடத்திற்கு தள்ளியிருக்கிறது. நிதி நிர்வாகம் குறித்து பேசுவதற்கு எந்தத் தகுதியும் திமுகவுக்கு இல்லை என்பதையே இந்த ஆய்வு காட்டுகிறது" என்று தெரிவித்துள்ளார்.

ஒவ்வொரு மாநிலத்தின் பொருளாதார நிலை

இந்திய தலைமைக் கணக்காயர் அலுவலகம் "மாநிலங்களின் நிதி நலம்: பத்தாண்டுகளில் அதிகரித்த பொதுக்கடன்" என்ற தலைப்பில் ஒரு ஆய்வறிக்கை வெளியிட்டுள்ளது. இந்த அறிக்கையில், கடந்த 10 ஆண்டுகளில் ஒவ்வொரு மாநிலத்தின் பொருளாதார நிலை எப்படி இருந்தது என்பதை பற்றி கூறப்பட்டுள்ளது. குறிப்பாக, வருவாய் பற்றாக்குறை, நிதி பற்றாக்குறை மற்றும் பொதுக்கடன் ஆகியவை எந்த அளவுக்கு அதிகரித்துள்ளது என்பது பற்றியும் கூறப்பட்டுள்ளது.

இந்த அறிக்கையில் உள்ள அதிர்ச்சியூட்டும் தகவல் என்னவென்றால், தமிழ்நாடு உள்ளிட்ட 11 மாநிலங்கள் வாங்கும் கடனில் பெரும் பகுதியை கட்டமைப்பு வசதிகளை மேம்படுத்த செலவிடுவதில்லை. மாறாக, ஊதியம் மற்றும் மானியங்களுக்காக செலவிடுகின்றன.

பொதுவாக, ஒவ்வொரு மாநில அரசுக்கும் இரண்டு வகையான செலவுகள் இருக்கும். ஒன்று, வருவாய் செலவுகள். மற்றொன்று, மூலதனச் செலவுகள். வருவாய் செலவுகள் என்றால், அரசு நிர்வாகம் மற்றும் அன்றாட இயக்கத்துக்கான செலவுகள். மூலதனச் செலவுகள் என்றால், கட்டமைப்பு வசதிகளை மேம்படுத்துவதற்கான செலவுகள். தங்க விதி என்னவென்றால், வருவாய் செலவுகளை வருவாய் வரவுகளில் இருந்துதான் செய்ய வேண்டும். மூலதனச் செலவுகளுக்காக மட்டுமே கடன் வாங்க வேண்டும்.

வருவாய் பற்றாக்குறை அதிகரிப்பு!

வருவாய் செலவுகளை கட்டுப்படுத்தாமல், கடன் வாங்கி செலவு செய்தால், வருவாய் பற்றாக்குறை ஏற்படும். இது மோசமான நிதி நிர்வாகத்தின் அடையாளம். ஒரு மாநிலத்தின் கடன் சுமை அதிகரிப்பதற்கு காரணம், வருவாய் பற்றாக்குறை அதிகரித்துக் கொண்டே செல்வதுதான் என்று அன்புமணி ராமதாஸ் கூறுகிறார்.

இந்தியாவில் உள்ள 28 மாநிலங்களில் 16 மாநிலங்கள் வருவாய் செலவுகளை கட்டுப்படுத்தி, வருவாய் உபரியை ஏற்படுத்தியுள்ளன. உத்தரப் பிரதேசம் 2022-23 ஆம் ஆண்டில் ரூ.37,000 கோடி வருவாய் உபரி ஈட்டியுள்ளது. குஜராத், ஒடிசா, ஜார்கண்ட், கர்நாடகம் போன்ற மாநிலங்களும் வருவாய் உபரி ஈட்டியுள்ளன. ஆனால், தமிழ்நாடு உள்ளிட்ட 12 மாநிலங்கள் வருவாய் பற்றாக்குறையுடன் தடுமாறுகின்றன. தமிழகத்தின் வருவாய் பற்றாக்குறை ரூ.36,215 கோடியாக உள்ளது. நிதி நிர்வாகத்தின் அடிப்படையில் பார்த்தால், உத்தரப் பிரதேசம் முதலிடத்தில் உள்ளது. ஆனால், தமிழ்நாடு 27-ஆம் இடத்தில் உள்ளது. இது திமுக அரசின் தோல்வியாகும் என்று அன்புமணி ராமதாஸ் சாடியுள்ளார்.

நிதி நிர்வாகத்தை மேம்படுத்தாத திமுக அரசு

ஒரு காலத்தில் பின்தங்கிய மாநிலங்களாக கருதப்பட்ட உத்தரப் பிரதேசம், மத்தியப் பிரதேசம் மற்றும் அவற்றிலிருந்து பிரிக்கப்பட்ட மாநிலங்களான உத்தர்காண்ட், சத்தீஸ்கர், ஜார்கண்ட் ஆகியவை கூட வருவாய் உபரி ஈட்டுகின்றன. ஆனால், பொருளாதார வளர்ச்சியில் சாதனை படைத்து விட்டதாகக் கூறிக் கொள்ளும் திமுக அரசு, ஆட்சிப் பொறுப்புக்கு வந்து 5 நிதிநிலை அறிக்கைகளை தாக்கல் செய்தும், இன்று வரை வருவாய் பற்றாக்குறைக்கு முடிவு கட்ட முடியவில்லை. நிதி நிர்வாகத்தை மேம்படுத்த திமுக அரசு எதுவும் செய்யவில்லை என்பதையே இது காட்டுகிறது என்று அன்புமணி ராமதாஸ் தெரிவித்துள்ளார்.

இந்திய தலைமைக் கணக்காயர் அலுவலகம் வெளியிட்டுள்ள அறிக்கையில் உள்ள தகவல்கள் 2022-23 ஆம் ஆண்டு வரையிலானவை. அதற்குப் பிறகும் கூட தமிழகத்தின் நிதிநிலை மேம்படவில்லை. தமிழகத்தின் வருவாய் பற்றாக்குறையும் குறைக்கப்படவில்லை என்பதுதான் உண்மை.

திமுக அரசு 2023-24 ஆம் ஆண்டில் வருவாய் பற்றாக்குறையை ரூ.13,582 கோடியாக குறைக்க இலக்கு நிர்ணயித்திருந்தது. ஆனால், அது ரூ.37,540 கோடியாக அதிகரித்தது. 2024-25 ஆம் ஆண்டில் ரூ.18,583 கோடி இலக்கு நிர்ணயிக்கப்பட்டிருந்த நிலையில், அது ரூ.49,278 கோடியாக அதிகரித்துவிட்டது. நடப்பாண்டில் வருவாய் பற்றாக்குறையை ஒழித்து, ரூ.1218 கோடி வருவாய் உபரி ஈட்ட இலக்கு நிர்ணயிக்கப்பட்டிருந்த நிலையில், வருவாய் பற்றாக்குறை ரூ.52,781.17 கோடியாக அதிகரித்துவிட்டது. அதேபோல் நிதிப்பற்றாக்குறையும் ரூ.1 லட்சம் கோடியைத் தாண்டிவிட்டது. அதை சமாளிக்க அரசு கடனை வாங்கிக் குவிக்கிறது.