தமிழகத்தில் அடுத்த ஒரு வாரத்திற்கு கனமழைக்கு வாய்ப்பு : டெல்டா வெதர்மேன் கணிப்பு!
அடுத்த 7 - 8 நாட்களுக்கு தமிழகத்தில் பரவலாக இடியுடன் கூடிய மழை தொடரும் என்று டெல்டா வெதர்மேன் கணித்துள்ளார்.
தமிழகத்தில் தென்மேற்கு பருவமழை ஏறக்குறைவு நிறைவு பெறும் தருவாய்க்கு வந்துள்ளது. அடுத்த மாதம் வடகிழக்கு பருவமழை தொடங்கலாம் என்றும், அது நவம்பர், டிசம்பர் மாதங்களில் தீவிரமாக இருக்கலாம் என்றும் வானிலை ஆய்வாளர்கள் கணித்துள்ளனர். அதே சமயம் புயல், காற்றழுத்த தாழ்வு நிலை உள்ளிட்டவை உருவாகி இயல்பை விட அதிக மழையைக் கொடுக்கும் என்றும் எதிர்பார்க்கப்படுகிறது. இது ஒருபுறம் இருக்க சென்னை உள்ளிட்ட பகுதிகளில் கடந்த சில நாட்களாக இரவு நேரத்தில் மழை பெய்து வருகிறது.
இந்த நிலையில் மழை நிலவரம் தொடர்பாக டெல்டா வெதர்மேன் ஹேமச்சந்திரன் சில தகவல்களை பதிவிட்டுள்ளார். அதில், “வட மாவட்டங்களான வேலூர், ராணிப்பேட்டை, திருவள்ளூர், சென்னை மாவட்டங்களில் பரவலாக இடியுடன் கூடிய கனமழை பதிவாகியுள்ளது. கசென்னை மற்றும் புறநகர்மாவட்டங்களில் பலத்த இடி,மின்னலுடன் கூடிய கனமழை பெய்து வருகிறது. இன்று வடகடலோரம், வடக்கு உள் மாவட்டங்கள், டெல்டா, தென்மாவட்டங்கள் என பரவலாக இடியுடன் கூடிய மழைக்கு வாய்ப்பு உள்ளது.
இன்று (16.09.2025) முதல் (23.09.2025) வரையில் அடுத்த 7 - 8 நாட்களுக்கு தமிழகத்தில் பரவலாக இடியுடன் கூடிய மழை தொடரும். மாலை, இரவு உள் மாவட்டங்களிலும், நள்ளிரவு மற்றும் அதிகாலை நேரத்தில் கடலோர மாவட்டங்களிலும் மழை எதிர்ப்பார்க்கலாம்” என்று தெரிவித்துள்ளார்.
அதேபோல டெல்டா வெதர்மேனின் மற்றொரு பதிவில், “வடகிழக்கு பருவமழை சுமார் நான்கு வாரங்களில் நெருங்கி வருவதால், இந்திய வானிலை ஆய்வு மையம் (IMD) சென்னை மற்றும் காரைக்கால் வானிலை ரேடார்களின் பணியில் இருப்பதை உறுதி செய்ய வேண்டும், இவை தற்போது பராமரிப்பில் தொடர்கிறது.
கூடுதலாக, பொதுமக்களுக்கு அணுக முடியாத பள்ளிக்கரணை NIOT ரேடாரை, அனைவருக்கும் திறந்த அணுகலை வழங்க இந்திய வானிலை ஆய்வு மையம் பரிசீலிக்க வேண்டும். அனைத்து ரேடார் செயல்பாடுகளும் பருவமழை செயல்பாடுகளை திறம்பட கண்காணிப்பதில் பெரும் பங்கு வகிப்பதால், ரேடார் பிரச்சனைகளை முன்னுரிமைப்படுத்த வேண்டிய அவசரத்தை வலியுறுத்துகிறேன்.
