சென்னை மாநகர போக்குவரத்து கழகம் தனியார்மயமாகிறது – 600 மின்சார பேருந்துகளுக்கு ஒப்பந்தப்புள்ளி கோரல்!

சென்னையில் அரசுப்பேருந்துகள் மட்டுமே இயங்கி வந்த நிலையில், மாநகர போக்குவரத்துக்கழகம் தனியார் பேருந்துகளையும் இயக்க முடிவு செய்துள்ளது. இதற்காக 600 மின்சார பேருந்துகளை Gross Cost Contract (GCC) முறையில் தனியார் நிறுவனங்களுக்குக் கடமையாக்கி இயக்க ஒப்பந்தப்புள்ளி கோரப்பட்டுள்ளது.

தற்போது சென்னையில் 625 வழித்தடங்களில் 3,436 அரசு பேருந்துகள் இயக்கப்பட்டு வருகின்றன. தினசரி 30 லட்சத்திற்கும் அதிகமான பயணிகள் அரசு பேருந்துகளில் பயணம் செய்கிறார்கள். மகளிருக்கான கட்டணம் இல்லா சேவை, பள்ளி மற்றும் கல்லூரி மாணவர்களுக்கு பஸ் பாஸ், முதியவர்களுக்கான சிறப்புச் சலுகை உள்ளிட்ட பல திட்டங்களை மாநகரப் போக்குவரத்துக் கழகம் செயல்படுத்தி வருகிறது.

அரசுப்பேருந்துகள் மட்டுமே இயக்கப்பட்ட சூழலில், தனியார் பேருந்துகளும் இணைக்கப்படுவது குறித்து பல்வேறு தரப்பினரும் எதிர்ப்பு தெரிவித்திருந்தனர். இதனால் தனியார்மயமாகும் போக்குவரத்து திட்டம் விவாதத்திற்குரியதாக மாறியது.

இந்நிலையில், மாநகர போக்குவரத்து கழகம் மின்சார பேருந்துகளை தனியார் இயக்க ஒப்பந்தப்புள்ளி கோரியுள்ளது. பேருந்துகள் நகரப் போக்குவரத்துக் கழகம் சார்பில் இயக்கப்படும் நிலையில், பேருந்து பராமரிப்பு மற்றும் ஓட்டுநர் நியமனம் தனியார் மூலமாக மேற்கொள்ளப்படும். மாநகர போக்குவரத்துக்கழகம் சார்பாக நடத்துநர்கள் நியமிக்கப்படுவார்கள்.

ஒப்பந்தப்புள்ளி படிவங்களை இன்று (12.02.2025) முதல் பதிவிறக்கம் செய்து கொள்ளலாம். 10.03.2025 முதல் பதிவேற்றம் செய்யலாம். படிவங்களை பதிவேற்ற இறுதி நாள் 03.04.2025 மாலை 4.00 மணி வரை என அறிவிக்கப்பட்டுள்ளது.

மாநகர போக்குவரத்துக்கழகம் வெளியிட்டுள்ள தகவலின்படி, ஒப்பந்தப்புள்ளி கோரல் தொடர்பான முழுமையான விவரங்களை https://tntenders.gov.in, https://mtcbus.tin.gov.in, https://tnidb.tn.gov.in ஆகிய இணையதள முகவரிகளில் பார்வையிட்டு கொள்ளலாம். ஒப்பந்ததாரர்கள் தங்களது ஒப்பந்தப்புள்ளி படிவங்களை https://tntenders.gov.in/nicgep/app என்ற அரசு இணையதளத்தில் பதிவேற்றம் செய்யலாம்.

சென்னையில் அரசு பேருந்துகளுடன் தனியார் பேருந்துகளும் இணைக்கப்படுவதால் போக்குவரத்துத் துறையில் பெரும் மாற்றம் ஏற்படலாம். இது பொதுமக்களுக்கு உதவியாக அமையுமா, அல்லது பாதிப்பை ஏற்படுத்துமா என்பது தொடர்பாக எதிர்காலத்தில் நிலவரம் எப்படி மாறும் என்பதை பொது மக்கள் ஆவலுடன் எதிர்பார்த்துவருகின்றனர்.